काठमाडौं । संविधानविद् राधेश्याम अधिकारीले नेकपालाई दलविहीन हुनबाट जोगिने गरी सर्वोच्च अदालतको फैसला आएको बताएका छन् ।
सर्वोच्चको आजको फैसलापछि बाह्रखरीसँगको संक्षिप्त कुराकानीमा अधिकारीले नेपाल कम्युनिस्ट पार्टीको विवाद भए पनि संसद्मा रहेका दललाई ‘तिम्रो दल छैन’ भन्ने अवस्था आउन नदिन पुराना दल कायम हुने फैसला गरेको हुनसक्ने बताए ।
“नेपाल कम्युनिस्ट पार्टीको आधिकारिकता विवादमा नेकपा ऋषि कट्टेलले पाउने गरी फैसला आएको छ । नेकपा ऋषि कट्टेलले पाएपछि सर्वोच्चमाथि सत्तारुढ दललाई नै दलविहीन बनाएको आरोप आउन सक्थ्यो,” अधिकारीले भने, “त्यस्तो अवस्थामा निकास दिनु आवश्यक थियो, त्यो निकासका लागि सर्वोच्चले एकताअघिका पार्टीलाई एकता गर्ने भए निर्वाचन आयोग जाऊँ, हैन भने पुरानै दल कायम गरेर जाऊँ भनेर फैसला गरेको हुनसक्छ ।”
उनले सर्वोच्चको अदालतले निर्वाचन आयोगलाई सहज बनाएको बताए ।