काठमाडौं । प्रधानमन्त्री केपी शर्मा ओलीले प्रत्यक्षतर्फ ११६ सिट जित्दा पनि नेकपाका केही नेता भत्काउन हिँडेको बताएका छन् ।
शनिबार मेलम्ची खोलाको पानी सुरुङमार्फत काठमाडौं ल्याएर बटम खोल्दै प्रधानमन्त्री ओलीले पुष्पकमल दाहाल 'प्रचण्ड' र माधवकुमार नेपाल नेपाली कांग्रेसलाई सरकारको नेतृत्व बुझाउन हिँडेको भन्दै त्यस्ताहरूलाई सरकारले ठेगान लगाउने बताए ।
मेलम्ची खोलाको पानी वाग्मती खोलामा झार्दै उनले सरकारले उधुम गर्न थालेकाले प्रचण्ड–नेपाल समूहलाई छटपटी भएको बताए । उनीहरु हल बाँधेर कांग्रेसकहाँ निवेदन हाल्न पुगेको आरोप पनि ओलीले लगाए ।
“सरकारले मेलम्चीको पानी ल्यायो । रेल ल्यायो । सुरुङ युग प्रारम्भ गर्यो । उधुमै गर्न लाग्यो भनेर हटाउन परेको छ,” उनले कार्यक्रममा भने ।
उनले सुन्दरीजलमा लड्डु वितरण नगरिएकाले घरघरमा गएर खान र सँगै दीपावली गर्न भन्दै अन्तिममा पनि कटाक्ष गरे ।