काठमाडौं । ललितपुरमा महिला हस्तकला मेला फागुन २२ गतेदेखि हुने भएको छ ।

नेपाल हस्तकला महासंघ र ललितपुर महानगरपालिकाले संयुक्त रुपमा आयोजना गरिने मेला तीन दिन अर्थात् फागुन २४ गतेसम्म चल्नेछ । नेपाल हस्तकला महासंघ र ललितपुर महानगरपालिकाले संयुक्त रुपमा बिहीबार पत्रकार सम्मेलन गर्दै महिला हस्तकला मेला २०७७ हुने जानकारी गराएको हो । 

‘हस्तकलाको प्रवर्द्धन महिला सशक्तीकरणको संवर्द्धन’ भन्ने नारासहित हुने मेलामा नेपाली उत्पादन तथा नेपालको पहिचान झल्कने गरी स्टलहरु राखिने भएको छ ।

मेलामा साना-ठूला गरी ५० भन्दा बढी स्टल रहने बताइएको छ । मेलामा नेपाली ढाका, बाँस, काष्ठकला, गरगहना, कपडा, सिसा, धातु तथा कागजबाट बनाइएका सामानहरुको प्रदर्शन हुनेछ । हस्तकला मेला ललितपुर महानगरपालिकाअगाडिको खाली स्थानमा हुनेछ ।