काठमाडौं । नेपाल कम्युनिस्ट पार्टी (नेकपा) दाहाल-नेपाल समूहका वरिष्ठ नेता झलनाथ खनालले नेत्रविक्रम चन्द समूहलाई वार्तामा ल्याउनु स्वागतयोग्य कदम भएको बताएका छन् । जटिल राजनीतिक परिस्थितिमा यसलाई उपयोगको माध्यम बनाइन नहुनेतर्फ उनले सरकारको ध्यानाकर्षण गराएका छन् ।

गृहमन्त्री रामबहादुर थापा बादल नेतृत्वको सरकारी वार्ता टोली र विप्लव समूहबीच आजै तीनबुँदे सहमति भएको थियो । विप्लवमाथि लगाइएको प्रतिबन्ध फुकुवा गर्न र शान्तिपूर्ण रूपमा राजनीतिक गतिविधि गर्न दुवै पक्ष सहमत भएका थिए ।

नेकपाका वरिष्ठ नेता खनालले सरकारको यो प्रयत्नलाई सकारात्मक रूपमा लिनुपर्ने धारणा राखेका हुन् । बाह्रखरीसँग सङ्क्षिप्त कुराकानी गर्दै नेता खनालले भने, “अहिले विप्लव समूह र नेपाल सरकारकाबीचमा जुन सहमति भएको छ, त्यो सकारात्मक कुरा हो । सुरुमा विप्लव समूहमाथि प्रतिबन्ध लगाउनुपर्ने कुनै आवश्यकता थिएन । यो सरकारले बिनाकारण प्रतिबन्ध लगाउने काम गरेको थियो । अहिले प्रतिबन्ध फुकुवा गर्ने सहमति गरेर ठीकै गरेको छ । यो संविधानअन्तर्गत सबैलाई शान्तिपूर्ण ढङ्गले अगाडि बढ्ने अधिकार प्राप्त छ । यसलाई उपयोग गर्दै यसलाई विप्लव समूहले राजनीतिक, क्रियाकलाप, काममा लाग्छ भन्नेमा हामीलाई विश्वास छ ।”

खनालले यसलाई राजनीतिक दाउपेचको विषय नबनाउन पनि आग्रह गरेका छन् । संसद् विघटन र पुनःस्थापनापछि मुलुकको राजनीतिक अवस्था जटिल बनेको छ । विप्लवलाई शान्तिप्रक्रियामा ल्याएर सरकारले अरू सहमति गर्ने र राजनीतिक कोर्सलाई झन् पेचिलो बनाउने हो कि भनेर नेकपाका नेताहरूले आशंका पनि गरेका छन् ।

भोलि नै विप्लव सार्वजनिक हुनेछन् । प्रधानमन्त्री केपी शर्मा ओली र विप्लवले एउटै मञ्चबाट सम्बोधन गर्ने कार्यक्रम पनि तय भइसकेको छ ।