काठमाडौं । प्रमुख प्रतिपक्षी दल नेपाली कांग्रेसको पदाधिकारी बैठक आज दिउँसो ३ बजे बस्दै छ । सभापति शेरबहादुर देउवाले सत्ता गठबन्धनमा सहकार्य गर्ने÷नगर्ने विषयमा पार्टीमा भएको विवाद व्यवस्थापनका लागि आफ्नै निवासमा पदाधिकारी बैठक डाकेका हुन् ।

प्रतिनिधिसभा विघटनयता नेपाल कम्युनिस्ट पार्टी (नेकपा) दुई समूहमा विभाजित छ । कानुनी रूपमा पार्टी नफुट्दै यही फागुन ११ गते प्रतिनिधिसभा पुनःस्थापना भएपछि प्रधानमन्त्री केपी शर्मा ओली सरकारको विकल्प खोजी भइरहेको छ । यस्तो बेला देउवा नेतृत्व दिने नेकपाको समूहसँग सहकार्यको तयारीमा छन् भने वरिष्ठ नेता रामचन्द्र पौडेल कांग्रेसले फ्लोरबाट समर्थन दिएर प्रतिपक्षमा बस्नुपर्ने बताइरहेका छन् ।

ओली समूहलाई समर्थन गर्न नहुने र प्रचण्ड–नेपाल समूहलाई सर्तसहित फ्लोरबाट समर्थन दिएर बाँकी अवधि प्रतिपक्षमै बस्नुपर्छ भन्ने पौडेललाई सभापति देउवाले सरकारको नेतृत्व पाउँदा त्यो अवसर गुमाउन नहुने विषयमा सहमत गराउने प्रयास गरिरहेका छन् । उनले ओलीले राजीनामा दिएर आए सत्ता गठबन्धनका लागि आफू खुला रहेको जनाउ दिइसकेका छन् भने प्रचण्ड–नेपाल समूहलाई पनि कांग्रेसकै नेतृत्वका लागि सहमत भए मात्र सहकार्य हुने संकेत गरेका छन् ।

यसले कांग्रेसमा विवाद बढेको छ । विगतमा पदाधिकारी बैठकबाटै नेकपा एउटै भएको र दुवै समूहसँग सहकार्य नहुने बताएको कांग्रेसका सभापति अहिले जुनसुकै समूहको समर्थनमा भए पनि प्रधानमन्त्री बन्ने पक्षमा देखिएका छन् । कांग्रेसको पदाधिकारी बैठकले पार्टीभित्र जारी विवाद बढाउला वा घटाउला भन्ने चासो बढिरहेको छ ।