काठमाडौं । कोभिड–१९ को प्रभावका कारण पछिल्ला दुई त्रैमासको आथिक वृद्धिदर ऋणात्मक बनेको छ । कोभिड नियन्त्रणको लागि ०७७ चैत ११ गतेबाट भएको लकडाउन र त्यसपछि बढेको कोभिड संक्रमणले गर्दा आर्थिक वर्ष २०७६/०७७ को अन्तिम त्रैमास र आर्थिक वर्ष २०७७/०७८ को प्रथम त्रैमासको आर्थिक वृद्धिदर ऋणात्मक बनेको हो ।
गत आर्थिक वर्षको अन्तिम त्रैमास (२०७७ वैशाखदेखि असारसम्म)मा आर्थिक वर्ष २०७५/०७६ को सोही अवधिको तुलनामा आर्थिक वृद्धिद्धर १५.५ प्रतिशतले ऋणात्मक र चालु आर्थिक वर्षको प्रथम त्रैमास (२०७७ साउनदेखि असोजसम्म)मा आर्थिक वृद्धिदर ४.६ प्रतिशतले ऋणात्मक भएको केन्द्रीय तथ्यांक विभागले जनाएको छ । यद्यपि, ग्राफमा हेर्न हो भने अर्थतन्त्र अंग्रे्रजी ‘भी’ सेभ बनाएइर पुनरुत्थान भएको देखिन्छ ।
कोभिड प्रभाव सुरु हुनअघि पनि आर्थिक वृद्धिदर भने खासै राम्रो नभएको विभागको तथ्यांकमा देखिन्छ । कोभिड प्रभाव सुरु हुनुपूर्व गत आर्थिक वर्षको प्रथम त्रैमासमा २.७ प्रतिशत, दोस्रो त्रैमासमा ४.४ र तेस्रो त्रैमासमा १.३ प्रतिशतले मात्रै अर्थतन्त्र विस्तार भएको विभागको तथ्यांकमा देखिन्छ । जबकि, तत्कालीन अर्थमन्त्री डा. युवराज खतिवडाले आर्थिक वर्ष २०७६/७७ को बजेट ल्याउँदा साढे ८ प्रतिशतको उच्च आर्थिक वृद्धि हासिल हुने लक्ष्य प्रस्तुत गरेका थिए ।
राष्ट्रिय लेखा तथ्यांकको आधार वर्ष परिवर्तन गर्दा गत आर्थिक वर्षमा १.९९ प्रतिशतले आर्थिक वृद्धिदर ऋणात्मक भएको विभागले जनाएको छ । आधार वर्ष परिवर्तन गर्नु अगाडि २.२७ प्रतिशतले आर्थिक वृद्धि हुने अनुमान गरिएको थियो ।