काठमाडौं । जनयुद्धले खारिएको राता फिलिङ्गामध्ये एक हुन्, मणि थापा । राजनीतिका अतिरिक्त गीत सिर्जना पनि निपुण थापाकै रचनाबाट उद्वेलित र वशीभूत भएर क्रान्तिमा समर्पित हुने थुप्रै थिए, जनयुद्धताक ।

कालान्तरमा तिनै थापा प्रधानमन्त्री केपी शर्मा ओलीको असंवैधानिक कदमलाई सही छ भन्ने निष्कर्षमा पुगे । संसद्विहीनता, रिक्तताको कानुनी छिद्रबाट छिरेर मन्त्रीको कुर्सीमा पुगे । प्रधानमन्त्री ओलीको कदम अदालतले उल्ट्याइसकेकाले उनको मन्त्री पद कानुनतः बढीमा ४ महिना टिक्छ ।

पहिलोपल्ट मन्त्री पदमा पुगेका थापाले कार्यसम्पादनमा मात्रै होइन, सार्वजनिक मञ्चमा पनि ख्याल पुर्‍याउनुपर्ने हो । कम्युनिस्ट आन्दोलनको स्कुलमा हुर्किएका थापाले त्यति विचार पुर्‍याउन सकेनन् । र, चिप्लिए ।

सुर्खेतमा आयोजित सार्वजनिक कार्यक्रममा थापाको मुखबाट ‘श्री ५ को सरकार’ उछिट्टियो ।

“सुर्खेतका आदरणीय जनसमुदायहरू म सबैलाई नेकपा स्थायी कमिटीका तर्फबाट र श्री ५ को सरकारको तर्फबाट अभिवादन गर्न चाहन्छु,” थापाले सम्बोधनका क्रममा भनेका थिए ।

नियतवश नभइ भुलवश थापाको मुखबाट ‘श्री ५ को सरकार’ उम्किए पनि उनको आलोचना नहुने कुरा थिएन । प्रधानमन्त्रीको संविधानविरोधी कमदबाट क्षुब्ध बनेका विपक्षी र आम नागरिकले पनि मन्त्रीको सक्दो आलोचना गरे । थापा सार्वजनिकरूपमै आत्मालोचित पनि भए ।

प्रधानमन्त्री केपी शर्मा ओली आफ्ना अभिव्यक्तिका कारण बारम्बार विवादमा आइरहन्छन् । दोस्रोपटक सरकारको नेतृत्व गरेयता नै उनले बोलीमा लगाम लगाउनुपर्ने टिप्पणी भइ नै रहेको थियो ।

तर, पुस ५ गतेयता उनी बढी नै असहिष्णु भावमा प्रकट हुन थालेका छन् । विपक्षीलाई सत्तोसराप गर्नेदेखि ‘सहिद भएर गएको भए श्रद्धाञ्जलि दिन्थेँ’ भन्नेसम्मका अभिव्यक्ति प्रधानमन्त्री ओलीको छुद्रताको मानक बनेका छन् ।

अभिव्यक्तिकै कारण प्रधानमन्त्री सर्वत्र आलोच्य बनिरहँदा मन्त्रीहरूले पाठ सिक्नुपर्ने हो । विडम्बना मन्त्रीहरू उनकै बोलीमा लोली लगाइरहेका छन् । प्रधानमन्त्रीकै दुर्वचनको सिको गरिरहेका छन् । र, भाषणहरूमा प्रस्तुत भइरहेका छन् ।

सरकारका शिक्षा, विज्ञान तथा प्रविधिमन्त्री कृष्णगोपाल श्रेष्ठले पाटन कलेज फर प्रोफेसनल स्टडिजको तेस्रो दीक्षान्त समारोहमा दिएको मन्तव्य अहिले खुबै चर्चामा छ । दीक्षान्त समारोहका मुख्य वक्ता रहेका शिक्षामन्त्रीले देशको शैक्षिक अवस्था, विद्यार्थीहरूको भविष्य, पठन पूरा गरेका विद्यार्थीहरूलाई कसरी व्यावसायिक बनाउने, ज्ञान, सीप, क्षमता राष्ट्र विकासका लागि खर्चने आदि योजना पस्नुपर्ने हो । त्योसँग सम्बधित धारणा सुनाउनुपर्ने थियो । मूलतः सरकारको नीति बताउनुपर्ने थियो ।

तर, उनले आफ्नो ओहोदा बिर्सिए । प्रधानमन्त्रीलाई हटाउने कोही माइकालाल जन्मिएको छ ? भन्दै अप्रासंगिक भाषण गरे । 

“यो दुनियाँमा कोही माइकालाल जन्म्या छ ? केपी ओलीलाई कठालोमा समातेर ल्याउने ? यो दुनियाँमा कोही माइकालाल जन्म्या छैन । केपी ओली इज द केपी ओली । फुटबलको पेलेजस्तै हो । कसैलाई रहर लागेर १३ दिनभित्र राजीनामा दिएन भने सडकमा ल्याएर पछार्छु रे...! के भन्या यो ? तागत छ ? जसरी बुझ्न मन लाग्छ बुझ्नुस् । यथार्थ सत्य यही हो । के राजीनामा दे भन्दैमा खुरुक्क राजीनामा दिन्छ ? राजीनामा दे भन्नेहरूले बनाएको प्राइमिनिस्टर हो ? अदालतको फैसलाले आएको सरकार हो यो ? यो त जनताका जनताको जनमतको बलमा आएको सरकार हो । ढुक्क हुनुस्, ढुक्क हुनुस् । हिजोभन्दा बलियो, पावरफुल सरकारको एजुकेसन मिनिस्टर यहाँ हाजिर छ । हिजोभन्दा पावरफुल भा’छु । कसैलाई रहर लागेर खुरुक्क राजीनामा देला भन्ठानेको होला । अहिलेको राजनीतिक निकासको अन्तिम उपाय भनेको जनादेश, तीन करोड जनतासँग सोध्ने भन्या हो । अदालतले फैसला गरेर सोध्न दिन्नँ भनेर तीनजना न्यायाधीसले फैसला गर्दिइहाल्नुभयो । फैसला गरेको मान्दिन्छौँ हामी । यसले समाधान दिँदैन, प्यारा विद्यार्थी भाइबहिनीहरू,” उनले मन्तव्यका क्रममा भनेका थिए ।

मन्त्रीको अभिव्यक्तिलाई लिएर अहिले सामाजिक सञ्जालमा बहस भइरहेको छ । यो बहस सेलाउन नपाउँदै सरकारका वन तथा तथा वातावरणमन्त्री प्रेम आले चर्चामा छन् ।

“जोजो मुछिएका छन् । जसले गल्ती गरेको छ । तिनलाई हदसम्मको कारबाही गर्ने भनेर सार्वजनिक लेखा समितिले निर्णय गरेर अख्तियार दुरुपयोग अनुसन्धान आयोगलाई हामीले प्रतिवेदन बुझायौँ । छानबिन पनि भइरहेको छ । वैज्ञानिक वन खारेज हुँदैन । यही कारणले प्रधानमन्त्रीले मलाई जिम्मेवारी सुम्पिनुभयो । छिटो वैज्ञानिक वन खारेज हुनुपर्छ भन्ने उहाँको मान्यता थियो । जुन दिनमा मैले पद बहाली गरेँ । काठ व्यवसायीदेखि लिएर, वनका केही बदमास कर्मचारीदेखि लिएर साराले भेट्ने प्रयास गरे । भेटौँ मन्त्रीज्यू भने । म कसैलाई भेट्दैन भनेँ । म कसैलाई भेट्दा पनि भेट्दिनँ । पछि कुरा केसम्म आयो भने हामी एक अर्ब पैसा उठाएर दिन्छौँ । अनि मैले भनेँ एक अर्ब पैसा समातेर आफ्नो मुखमा कालो मोसो आफैँ दल्ने मैले ? हुँदैन भनेर इन्कार गरेँ,” उनको अभिव्यक्ति थियो ।

त्यसो त, प्रेम आलेको पृष्ठभूमि सफा छैन । उनी आफैँ पनि वनसम्बन्धी मुद्दामामिलामा परेका व्यक्ति हुन् । अहिले यस प्रकारको अभिव्यक्ति दिएर उनले आफ्नो पदको गरिमा कायम राख्न नसकेको र के बोल्नुपर्ने हो ख्याल समेत पुर्‍याउन नसकेको टिप्पणी भइरहेको छ । आलोचना भइरहेको छ ।

तर, जति आलोचना गरे पनि मन्त्रीहरूको प्रधानमन्त्रीको बोली, शैली अनुकरण स्पर्धामा कुनै कमी आएको देखिँदैन ।