काठमाडौं । वाटरएड नेपाल र कोका कोला फाउन्डेसनको सहयोगमा एकीकृत शहरी विकास केन्द«ले आकाशे पानी सङ्कलन तथा भूमिगत जल पुन भरण परियोजना नेपाली सेनाको श्रीराज दल गण हाताभित्र हस्तान्तरण गरेको छ ।  जनवरी २०२० मा शुरु भएको यस सहकार्यात्मक परियोजना ललितपुर महानगरका मेयर चिरीबाबु महर्जनको उपस्थितिमा राजदल पाटन ब्यारेकमा हस्तान्तरण गरिएको हो ।

पाटन शहरको उच्च स्थानमा अवस्थित, लगनखेल क्षेत्र एउटा प्राकृतिक पुनःभरण क्षेत्र हो जहाँ भूमिगत जल पुनःभरण हुन्छ, जसले सामुदायिक इनार र ढुङ्गे धारामा पानीको आपूर्ति गर्दछ । यो परियोजना लगनखेल तथा यसका वरपरका क्षेत्रहरूमा भूमिगत जलको पुनःभरण गर्ने गरी र यस प्रविधिलाई अझ व्यापक समुदायहरू माझ प्रदर्शन गर्ने लक्ष्य राखेर सञ्चालनमा ल्याइएको छ ।

ब्यारेक परिसरभित्र ५१ वटा फिल्टर च्याम्बरसहितको ५१ पुन भरण इनारहरू निर्माण गरिएका थिए । यी इनारमार्फत सम्भाव्य जल पुन भरणको अपेक्षित वार्षिक परिमाण ५ करोड १० लाख लिटर रहेको जनाइएको छ । यसका अतिरिक्त सतहमा बग्ने पानीबाट थिगर तथा बालुवा हटाउनका लागि, यस क्षेत्रमा फोहर पानी ल्याउन सक्ने ठाउँहरूमा तिन वटा थिगर (सिल्ट) हटाउने बेसिनहरूको पनि निर्माण गरिएको थियो । भूमिगत जलको पुन भरण सम्बन्धी पहलकदमीको कार्यकुशलता प्रदर्शन गर्नका लागि एउटा वर्षा बगैँचाको निर्माण पनि गरिएको छ ।

नेपालमा कोका–कोला कम्पनीका देशीय निर्देशक अम्बुज सिंहले पानीका स्रोतहरूको संरक्षण तथा पुन भर्ने, जिम्मेवारीपूर्ण पानीको प्रयोगको प्रवर्धन तथा सबैजनाका लागि सफा पानीमा पहुँच सुनिश्चित गर्न सहयोग पुर्‍याउने जिम्मेवारी रहेको बताए । शहरी तथा ग्रामीण समुदायहरूमा जल संरक्षण अभ्यासहरू तथा अन्य नवीनतम परियोजनाहरूलाई प्रोत्साहित गर्न र कार्यान्वयनलाई हाँक्नका लागि नेपालमा वाटरएडसँगको साझेदारीले गति लिएको उनले बताए ।