काठमाडौं । नेपाल कम्युनिस्ट पार्टी (नेकपा) प्रचण्ड-नेपाल समूहका अध्यक्ष माधवकुमार नेपालले केपी ओलीलाई ‘फाउन्डेसन’ खोल्न सुझाव दिएका छन् । पेसागत महासंघ नेपाल र नेपाल राष्ट्रिय कर्मचारी महासंघबीच एकता सभालाई कार्की ब्याङ्क्वेटमा सम्बोधन गर्दै उनले ओलीलाई नाम र चिह्न प्रयोग गर्ने कुनै अधिकार नरहेको जिकिर गरेका हुन् ।

ओली कारबाहीमा परिसकेको र त्यसको जानकारी निर्वाचन आयोगले पाइसकेकाले उनका गतिविधि अवैध रहेको नेपालले बताएका हुन् ।

हामीले उनलाई (केपी) ओलीलाई हटाएका छौं । तर उनी नेकपाको अध्यक्ष भनेर भाषण गरेर नेकपाको नाम, उही चिह्न उही झन्डा प्रयोग गरेर हिँडिरहेका छन् । अरू पार्टीलाई पनि एउटै पार्टीको हो कि भन्ने भ्रममा पारेका छन् । निर्वाचन आयोगमा हामीले केपी ओली अब अध्यक्ष नरहेको जानकारी गराइसकेका छौँ । केपी ओली विधानभन्दा माथि हुन सक्छन्  ? कमिटीलाई हटाउने अधिकार हुन्छ । नेकपाको नाम प्रयोग गर्ने अधिकार केपी ओली र उनका नजिककालाई छैन ।”

‘केपी ओली फाउन्डेसन खोले’ राम्रो हुने भन्दै नेता नेपालले निर्वाचन आयोगले कानुनसम्मत आधिकारिकता विवाद निरूपण गरिदिने बताए । “यो पार्टी नै आधिकारिक भन्नेमा द्विविधा छैन । सूर्य चिह्न हामी जहाँ छौँ, त्यहीँ छ,” उनले भने ।

उनले देव गुरूङलाई मुख्य सचेतकबाट हटाउने कुरा पनि अधिकारभन्दा बाहिरको भएको बताए । संसदीय दलको नेताबाट निष्कासितले प्रमुख सचेतक फेर्न नसक्ने उनको भनाइ थियो । कार्यक्रम जारी छ । कार्यक्रममा पार्टी अध्यक्ष पुष्पकमल दाहाल प्रचण्ड पनि सहभागी छन् ।