पोखरा । प्रधानमन्त्री केपी शर्मा ओलीले विगतमा आफू पोखरामा डेरा गरेर बसेको र यस क्षेत्रको बारेमा जानकार रहेको बताएका छन् ।

सोमबार पोखरामा गण्डकी प्रदेश प्रशिक्षण प्रतिष्ठानको शिलान्यासपछि उनले गण्डकी प्रदेशका सम्भावना र विकासबारे आफू जानकार रहेको बताएका हुन् । झापा विद्रोहपछिको १४ वर्षे जेल जीवनको क्रममा उनी तीन वर्ष पोखरा र एक वर्ष स्याङ्जा कारागारमा रहेका थिए ।

“मेरो ठेगाना रत्ननगर, पार्दी थियो । म तीन वर्ष यहाँ बसेको हुँ । पोखरा, गण्डकीको बारेमा कसरी थाहा भयो भन्नुहोला । म यहीँ डेरा गरेर बस्थेँ,’’ उनले भने ।

जेलमा बस्दा आफूले पोखराको नक्सा बनाएको उनले सुनाए । “मैले नक्सा पनि बनाएको थिएँ । नक्सा देखेर जेलरले अचम्म मान्दै कसरी सही नक्सा बनाउनुभयो भनेर सोधेका थिए,’’ उनले भने, “म अध्ययनशील मान्छे हो ।’’