काठमाडौं । साताको पहिलो कारोबार दिन सेयर बजारमा ३ प्रतिशतभन्दा माथिको पहिरो गएको छ । लगातार उकालो लागेको बजार गत साताबाट घट्न सुरु भएको थियो । नेप्से घट्ने क्रमले यो साता पनि निरन्तरता पाएको छ ।

आज बजार परिसूचक नेप्से ७९.७४ अंकले गिरावट हुँदा २४७४.३९ अंकमा झरेको छ । आइतबार प्रि–ओपन सेसनमा साढे ३ अंक माथिले बढेर २५५७.७९ विन्दुमा खुलेको नेप्से कारोबार खुलेको केही समयमा नै आजको इन्ट्रा-डे कारोबारमा २५६१.८९ अंकसम्म पुगेको थियो । तर नियमित कारोबार खुलेसँगै केही समयमै ओरालो लाग्न सुरु भएको नेप्से २४७३.१६ अंकसम्म झरेको थियो । नेप्सेको क्लिोजिङ विन्दु र तल्लो विन्दुमा १ अंकको मात्रै छ ।

१२०० अंकभन्दा तल्लो विन्दुबाट ७ महिनामा २७०० अंकको नजिक पुग्दा ठुलो करेक्सन नदेखिएको बजारमा गत साताबाट भने करेक्सन संकेत देखिएको छ । गत साता ३.१३ प्रतिशतले घटेको नेप्से आज पनि ३.१२ प्रतिशतले घटेको छ । कोभिडपछि बैंकिङ प्रणालीमा लगातार उच्च तरलता रहनुको साथै घटेको ब्याजदरले बढाएको लगानकर्ताको मनोबल बैंकिङ प्रणालीमा तरलता संकुचन हुँदै जाँदा लगानीकर्ताको मनोबल पनि केही कमजोर भएको देखिन्छ ।

अर्कोतर्फ बजार नेप्सेमा १२० प्रतिशतभन्दा माथिको वृद्धि हुँदा पनि सामान्यबाहेक करेक्सन नभएको अवस्थामा अहिलेको केही ठूलो करेक्सन हुनसक्ने विश्लेषणमा लगानीकर्ता रहेको देखिन्छ । ठूलो बुलअगाडिको करेक्सन नभएकाले आत्तिनुपर्ने अवस्था नभएको टिप्पणी लगानीकर्ताहरुले गरिरहेका छन् । 

आइतबार सबै समूहमा गिरावट आएको छ । केही साताअघि नेप्सेमा सूचीकृत भएको चन्द्रागिरि हिल्सको सेयर मूल्यमा लागेको सकारात्मक सर्किटले होटेल उपसूचक हरियो भएको छ । सूचीकृत कम्पनीलाई ११ उपसमूहमा वर्गीकरण गरेको नेप्सेले आजबाट अन्य उपसमूहमा रहेका ४ कम्पनीहरुलाई छुट्याएर लगानी उपसमूह बनाएको छ । आज नेप्सेमा होटेलबाहेक ११ उपसूचक रातो भएको छन् ।

आज लगानी उपसूचक सर्वाधिक ४.१३ प्रतिशतले गिरावट हुँदा अन्य उपसूचकमा ३.८९ प्रतिशतको गिरावट आएको छ । यस्तै जीवन बिमा र उत्पादन तथा प्रशोधन उपसूचकमा समान ३.५५ प्रतिशतको गिरावट हुँदा लघुवित्त र हाइड्रोपावर उपसूचकमा पनि ३ प्रतिशतमाथिको गिरावट भएको छ । यस्तै बैंकिङ उपसूचक पनि २.९६ प्रतिशतले घटेको छ ।

भारि गिरावट भएको सेयर बजारमा कारोबार रकम भने सवा आठ अर्ब नाघेको छ । आज नेप्सेमा ९६ हजार १५१ पटक सेयर किनबेच हुँदा २०७ कम्पनीको १ करोड ६० लाख १७ हजार ३२२ कित्ता सेयरबाट ८ अर्ब ३५ करोड ५२ लाख ९० हजारको कारोबार भएको छ । प्रस्तावित बोनस र ३० प्रतिशत हकप्रद सेयर जारी गर्ने प्रस्ताव पारित गर्न साधारणसभा बोलाएको शिखर इन्स्योरेनसमा आज लगानीकर्ताको आकर्षण देखिएको छ । कम्पनीको एक अर्ब दुई करोड १६ लाख ३३ हजार रुपैयाँको कारोबार हुँदा नेपाल इन्फ्रास्ट्रक्चर बैंकको ६३ करोड ४९ लाख ५५ हजारको कारोबार भएको छ । नेपाल इन्फ्रास्ट्रक्चर बैंकको सर्वाधिक २३ हजार ५५६ पटकको कारोबारमा १२ लाख २९ हजार ०८० कित्ता सेयर किनबेच हुँदा उक्त कारोबार भएको हो ।

सूचीकृत ४ कम्पनी र ५ ऋणपत्र तथा १ म्युचुअल फन्डबाहेक सबैको मूल्य घटेका छन् । चार कम्पनीको मात्र सेयर मूल्य बढ्दा चन्द्रागिरि हिल्सको सेयर मूल्यमा सकारात्मक सर्किट लागेको छ । शिखर इन्स्योरेन्सको सेयर मूल्य २.८ प्रतिशत, एनएलजी इन्स्योरेन्सको ०.९९ र सगरमाथा इन्स्योरेन्सको सेयर मूल्य ०.६४ प्रतिशतले बढेको छ ।

यता गणपति माइक्रोफाइनान्सको सेयर मूल्य सबैभन्दा धेरै ७ प्रतिशतले घट्दा नेपाल फाइनान्सको साढे ६ प्रतिशतमाथि र नेपाल इन्फ्रास्ट्रक्चर बैंक, नेपाल हाइड्रो डेभलपर्स कम्पनी र अपी पावरको सेयर मूल्य ६ प्रतिशतमाथिले घटेको छ ।