काठमाडौं । शिखर इन्स्योरेन्सले प्रस्तावित लाभांश पारित गर्न र पुनः हकप्रद सेयर हजारी गर्ने प्रस्तावसहित साधारणसभा बोलाएको छ । कम्पनीले आउँदो चैत ९ गते केन्द्रीय कार्यालय थापाथलीमा १५औँ र १६औँ वार्षिक साधारणसभा बोलाएको हो ।

आर्थिक वर्ष २०७५/०७६ र २०७६/०७७ को साधारणसभा एकसाथ गर्न लागेको कम्पनीले चालु आर्थिक वर्षमा नै बँँडफाँड गरेको हकप्रदपछि कायम चुक्ता पुँजीको २७.७६९ प्रतिशत बोनस सेयर र बोनस सेयरमा लाग्ने कर प्रयोजनको १.४६२ प्रतिशत नगद लाभांश वितरण गर्ने प्रस्ताव गरेको थियो । कम्पनीले असार मसान्तमा कायम चुक्ता पुँजीको ३६.१ प्रतिशत बोनस सेयर  र बोसन सेयरमा लाग्ने कर प्रयोजनाको लागि १.९ प्रतिशत गरी कुल ३८ प्रतिशत लाभांश प्रस्ताव गरेको हो ।

कम्पनीले साधारणसभामा प्रस्तावित बोनस सेयर पारित भएपछि कायम चुक्ता पुँजीको ३० प्रतिशत पुनः हकप्रद सेयर जारी गर्ने प्रस्तावसमेत लैजाने भएको छ । यस्तै, हाल संस्थापक र सर्वसाधारण सेयर अनुपात ६०ः४० प्रतिशतबाट ५१ः४९ प्रतिशत कायम गर्ने प्रस्ताव गरेको छ । कम्पनीले आगामी साधारणसभाबाट सर्वसाधारणको तर्फबाट दुईजना सञ्चालक पनि निवार्चित गर्नेछ ।

साधारणसभाको लागि कम्पनीले फागुन २६ देखि चैत ९ गतेसम्म बुकक्लोज गर्ने भएको छ । यसअनुसार फागुन २५ गतेसम्म कायम सेयरधनीहरुले सो कम्पनीको लाभांश पाउनेछन् भने सभामा सहभागिता जनाउन सक्नेछन् ।

गत असार मसान्तसम्ममा इन्स्योरेन्सको चुक्ता पुँजी १ अर्ब ५ करोड ७३ लाख १० हजार ६०० रुपैयाँ थियो । सो चुक्ता पुँजीको १ बराबर ०.३ अनुपातमा हकप्रद सेयर निष्कासन तथा बाँडफाँडपश्चात् इन्स्योरेन्सको चुक्ता पुँजी १ अर्ब ३७ करोड ४५ लाख ३ हजार ८०० रुपैयाँ पुगेको छ । अब ३८ करोड १६ लाख ८९ हजार १२७ रुपैयाँ बराबरको बोनस सेयर वितरणपश्चात् इन्स्योरेन्सको चुक्ता पुँजी १ अर्ब ७५ करोड ६१ लाख ९२ हजार ९२७ रुपैयाँ पुग्नेछ ।