काठमाडौं । प्रधानमन्त्री केपी शर्मा ओलीले आफूले राजीनामा दिएर सहज निकास नदिने अडान दोहोर्‍याएका छन् ।

शुक्रबार चरणचरणमा सांसदहरूसँग छलफल गरेका प्रधानमन्त्री ओलीले जिम्मेवारीबाट नपन्छिने आइपर्ने सबै परिस्थितिको सामना गर्ने बताएका हुन् ।

“सरकार प्रमुख भएकाले आफ्नो कर्तव्यबाट विचलित हुन्न ।  दायित्व निर्वाह गर्छु,” बालुवाटार भेलामा सहभागी सांसद महेश बस्नेतले प्रधानमन्त्रीको भनाइ उद्धृत गर्दै भने, “जुन ढङ्गले अहिले गठबन्धन बनाएर मेराविरुद्ध रोइलो गर्दै हिँडेका छन् । म राष्ट्रियता, विकास र समृद्धिको पक्षमा लागिरहनेछु ।”

प्रधानमन्त्रीले अहिले पद छाडेर हिँड्ने सुविधा नरहेको पनि प्रष्ट पारेको उनको भनाइ छ ।

प्रधानमन्त्रीले आजै याक एण्ड यती होटलमा गण्डकी प्रदेशका सांसदहरूसँग भेटघाट गरेका थिए । बालुवाटारमा प्रदेश नम्बर एक र अन्य प्रदेशका पनि सांसदसँग छलफल गरेको बस्नेतले बताए ।

शनिबार बिहान ९ बजे बालुवाटारमै वामगती प्रदेशका सांसदहरूसँग छलफल तय भएको उनको भनाइ थियो ।

आजै प्रधानमन्त्री ओलीले संसदीय दलको प्रमुख सचेतकबाट देव गुरूङलाई हटाएर विशाख भट्टराई मनोनीत गरिसकेका छन् । अब छिट्टै बैठक बोलाउने तयारी भइरहेको उनले बताए ।

“उहाँहरूले हाम्रोतिर धेरै आउँछन् भनेर गरिरहनुभएको छ । आज बालुवाटारमा पार्टी विभाजन गर्नुहुँदैन भन्ने सांसदहरूको उपस्थिति रहेको, केही थपिएको र अरू धेरै आउने क्रममा हुनुहुन्छ,” उनले भने ।

बालुवाटारमा माया ज्ञवालीसहितका नेताहरू उपस्थित भएका थिए ।