काठमाडौं । राष्ट्रिय गौरवको आयोजना पोखरा अन्तर्राष्ट्रिय विमानस्थलको निर्माण कार्य धमाधम भइरहेको छ । सन् २०२१ को जुन महिनाभित्र निर्माण सम्पन्न गर्ने लक्ष्यका साथ आयोजनाको काम भइरहेको आयोजनाले जनाएको छ ।

हालसम्म ठेकेदार कम्पनीले आयोजनाको म्याद थप्नुपर्ने माग नगरेकाले तोकिएकै समयमा आयोजना सम्पन्न हुने अनुमान रहेको आयोजनाले जनाएको छ । विमानस्थलको भौतिक प्रगति ८२ प्रतिशत पुगेको छ ।

डाँडा काट्न अनुमतिको पर्खाइ

विमानस्थलको धावनमार्गको ‘अप्रोच’मा पर्ने ४० मिटर एउटा डाँडा काट्नुपर्ने छ । उक्त डाँडा काट्नको लागि वन मन्त्रालयको अनुमति कुरिरहेको आयोजना प्रमुख इन्जिनियर विनेश मुन्नाकर्मीले बताए । आयोजनाले डाँडा काट्ने अनुमतिका लागि वन मन्त्रालयलाई पत्राचार गरिसकेको छ । आयोजना प्रमुख मुन्नाकर्मीका अनुसार धावनमार्गको ‘अप्रोच’मा पर्ने डाँडाको तल निजी भूभाग सम्याउने काम भने भइरहेको छ । उनका अनुसार विमान अवतरण एवं उडान गर्ने मार्गमा नै यो डाँडा परेकाले काट्न आवश्यक छ ।

“४० मिटर ‘अप्स्ट्रयाकल’ परेको हुनाले डाँडा काट्नुपरेको हो । धावनमार्गको ‘अप्रोच’मा परेको र त्यसले उडान तथा अवतरणमा अवरोध पु¥याउने भएकाले काट्न परेको हो” उनले भने । उनका अनुसार अन्तर्राष्ट्रिय उडान ‘सिंगल अप्रोच’बाट हुनेछ भने आन्तरिकतर्फ रनवेको दुवै तर्फबाट उडान तथा अवतरण हुनेछ । अन्तर्राष्ट्रिय उडान पश्चिमतर्फबाट गर्दा सराङकोट डाँडा रहेकाले अन्तर्राष्ट्रिय उडान पूर्वतर्फबाट मात्रै हुने उनले बताए । तर, आन्तरिक उडान भने पूर्व र पश्चिम दुवै तर्फबाट गर्न मिल्छ ।

विमानस्थलमा ११ वटा जहाज पार्किङ गर्न सकिन्छ । यसमध्ये तीनवटा अन्तर्राष्ट्रिय, चारवटा एटीआर प्रकारका जहाज र चारवटा ट्वीनअटर जहाज पार्किङ गर्न सकिने आयोजनाले जनाएको छ । अन्तर्राष्ट्रियतर्फ ‘सी’ प्रकारका विमान एक र ‘डी’ प्रकारका दुईवटा विमान पार्किङ गर्न सकिने उनले बताए । आन्तरिकतर्फ दैनिक ४८ उडान र अवतरण एवं अन्तर्राष्ट्रियतर्फ ६ वटा उडान एवं अवतरण हुनेछ । पीक आवरमा आठवटासम्म अन्तर्राष्ट्रिय उडान र अवतरण हुने उनले बताए ।

करिब ३९ सय रोपनी क्षेत्रफलमा फैलिएको विमानस्थलको लागत करिब २२ अर्ब रुपैयाँ छ । यो विमानस्थलबाट वार्षिक आठ लाख यात्रुलाई सेवा दिन सकिने बताइएको छ ।