काठमाडौं । पूर्वसभामुख दमननाथ ढुंगानाले अदालतको अवहेलनासम्बन्धी मुद्दामा सर्वोच्च अदालतमा आफैँ उपस्थित भएर लिखित जवाफ बुझाएका छन् ।

बिहीबार उनले बुझाएको लिखित जवाफमा आफूले अवहेलना हुने गरी नबोलेको र  बोलेको कुरा तोडमोड गरी अवहेलना मुद्दा दायर गरिएको भन्दै अवहेलना पुष्टि भए हदैसम्मको कारबाही भोग्न तयार रहेको बताएका छन् । ढुंगानाले प्रतिनिधिसभा विघटनपछि आयोजित एक कार्यक्रममा न्यायाधीशहरुलाई जनताले सडकमा तान्न सक्ने आशयको अभिव्यक्ति दिएका थिए ।

त्यस्तै, उनले न्यायालय ‘पवित्रता’का नाममा खबरदारी र आलोचना गर्नै नमिल्ने संस्था नभएको पनि लिखित जवाफमा भनेका छन् । “न्यायालय पनि वस्तुतः समाजद्वारा समाजकै निमित्त राज्य र संविधानद्वारा निर्मित लोककल्याणकारी, परम जवाफदेही तथा सर्वोपरी जनमुखी न्याय प्रदाय राष्ट्रको उच्चतम तथा महान् संस्था हो । तसर्थ पनि जनताको संयमित तथा जिम्मेदारीपूर्ण खबरदारी कदाचित अदालतको अवहेलनाको विषयवस्तु मानिन वा हुन सक्दैन,” ढुंगानाको लिखित जवाफमा उल्लेख छ ।

ढुंगानाविरुद्ध अधिवक्ता राजाराम घिमिरेले अदालतको अवहेलनामा कारबाहीका लागि निवेदन दायर गरेका थिए । गएको माघ १५ गते न्यायाधीश मनोजकुमार शर्माको एकल इजलासले लिखित जवाफसहित आफैँ उपस्थित हुन आदेश गरेको थियो ।