काठमाडौं । संविधान निगरानी समूहले सर्वोच्च अदालतबाट भएको फैसला ऐतिहासिक कोसेढुंगा भएको जनाएको छ ।

समूहका तर्फबाट जारी प्रेस विज्ञप्तिमा भनिएको छ,“उक्त फैसला संवैधानिक विधिशास्त्रको दृष्टिले संविधान र संविधानवादको संरक्षणमा ऐतिहासिक कोसेढुंगा हो भन्ने हाम्रो धारणा छ । यस सन्दर्भमा चालु प्रतिनिधिसभाको हठात् विघटनबाट संविधानको कार्यान्वयनमा विचलन आएको हुनाले त्यसमा कुनै हदमा पनि विचलन आउन नदिने निरन्तर पहरेदारीको लागि यस समूहले गरेको यसअघिको आह्वानलाई स्मरण गर्न चाहन्छौँ ।”

संविधान जारी हुँदैमा र संसद् स्थापित हुँदैमा लोकतन्त्र  र संविधावादको स्वतः कार्यान्वयन नहुने हुँदा संविधानको उद्देश्यअनुरुप कार्यान्वयन गर्न गराउन आवश्यक होसियारी र जवाफदेहिताको साथ निरन्तर अग्रसर रहन सम्बन्धित सबैलाई आह्वान पनि गरिएको छ ।

समूह पूर्वप्रधानन्यायाधीश कल्याण श्रेष्ठको नेतृत्वमा रहेको छ । जसको सदस्यहरुमा पूर्वप्रधानन्यायाधीश सुशीला कार्की, हिमालयन शमशेर जबरा, तिर्थमान शाक्यलगायत रहेका छन् ।