काठमाडौं । पशुपतिनाथ मन्दिरमा एक अर्ब आठ करोड रुपैयाँको सुनको जलहरी राखिएको छ ।

सुनको जलहरी राख्ने निर्णयविरुद्ध सर्वोच्च अदालतमा रिट दायर भएकै समयमा पशुपति क्षेत्र विकास कोषले जलहरी राखेको हो । बुधबार राष्ट्रपति विद्यादेवी भण्डारीले पशुपतिनाथमा क्षमापूजा गरेपछि मूल मन्दिरका भट्ट, पुजारी तथा कालिगढले जलहरी राखेका हुन् ।

मंगलबार वाग्मती प्रदेशसभा सदस्य नरोत्तम वैद्य र अधिवक्ता निकिता  ढुंगानाले प्रधानमन्त्री तथा मन्त्रिपरिषद्को कार्यालय, संस्कृति, पर्यटन तथा नागरिक उड्डयन मन्त्रालय, गुठी संस्थान र पुरातत्व विभागविरुद्ध फरक–फरक दुईवटा रिट दायर गराएका थिए । युनेस्को र प्राचीन स्मारक संरक्षण ऐन, २०१३ विपरीत जलहरी राख्ने निर्णय गरिएको भन्दै रिट दायर गराएका हुन् ।

पशुपति क्षेत्र विकास कोषका कार्यकारी निर्देशक घनश्याम खतिवडाले पुरानो चाँदीको जलहरी खिइँदै गएकाले जलहरीबाट फोहोर निकालेर त्यसैमा सुनको जलहरी राखेको बताए । उनले चाँदीको जलहरी नहटाई त्यसैमा सुुनको जलहरी राखेकाले पुरानो सम्पदा नमासेको जिकिर गरे ।

‘‘गर्भगृहमा राखिएको जलहरीमा एक सय चार किलोको सुन किनिएको र बाँकी चार किलो तामा धातु मिसाइएको छ । तामा धातुले सुनको जलहरी बलियो हुन्छ । त्यसैअनुसार सेनाको सुरक्षामा मूल भट्ट, पुजारी र कालिगढले जलहरी राखेका हुन् । प्रधानमन्त्री केपी शर्मा ओलीले सुन किन्न सरकारबाट ३० करोड दिएका हुन् । बाँकी ६० करोड कोषले खर्च गरेको छ । सबै गरेर कोषले एक अर्ब आठ करोड खर्च गरेको छ,” उनले भने ।

प्रधानमन्त्रीको निर्देशनानुसार एक महिनामा सुनको जलहरी तयार पारी राखिएको कोषका सदस्यसचिव डा. प्रदीप ढकालले जानकारी दिए । उनले भने, ‘‘राष्ट्र बैंकबाट एक अर्ब चार करोडको सुन किनेर जलहरी चढाइएको छ । पुरानो जलहरी परिवर्तन नगरी चाँदीकै जलहरीमा सुनको जलहरी राखेकाले ऐनविपरीत छैन ।’’

सुनको जलहरी राखेलगत्तै जलहरीको सुरक्षामा खटिएका नेपाली सेना, नेपाल प्रहरी, मूल भट्ट, पुजारीलगायतको टोलीलाई कोषले सम्मान गर्‍यो ।

प्रदेशसभा सदस्य वैद्यले कोषले जबर्जस्ती गरेर सुनको जलहरी राखेको बताए । सर्वोच्चमा रिट दायर गर्दा पनि कोषले एकाएक कार्यक्रम गरी कसैलाई थाहै नदिई भित्री रूपमा क्षमापूजा गरी सुनको जलहरी राखेको उनको भनाइ छ ।

सर्वसाधारणले दुई दिनदेखि दर्शन गर्न पाएनन् 
दुई दिनदेखि पशुपतिनाथ मन्दिरमा प्रवेश नगरी बाहिरै पूजा गरेर फर्किएको सर्वसाधारणको भनाइ छ । सिन्धुपाल्चोकका ७० वर्षीय केशर भण्डारीले कोषले बिनासूचना कार्यक्रम आयोजना गर्दा सर्वसाधारण अलमलमा परेको बताए । उनले दुई दिनदेखि पूजा गरौँला भन्दै मन्दिरमा आएको तर पूजा गर्न नपाएर फलफूल बाहिरै चढाएर फर्कनुपरेको गुनासो गरे । ‘‘शिवरात्रिको अवसरमा पशुपति दर्शन गर्न भनेर गाउँदेखि आएको थिएँ । तर, यहाँ भने फरक अवस्था आइलाग्यो,” उनले भने ।

कोषले भने सर्वसाधारणका लागि पशुपति दर्शनमा आएको समस्याप्रति ध्यानाकर्षण भएको जनाएको छ ।