काठमाडौं । नेप्सेको सिस्टममा पटक-पटक समस्या देखिँदा लगानीकर्तामा देखिएको अन्योलबीच सेयर बजार परिसूचक नेप्से दोहोरो अंकले बढेको छ । 

कहिले नेपाल इन्फ्रास्ट्रक्चर बैंक (निफ्रा) को सेयर मूल्य १०० प्रतिशतले घटेको देखिँदा नेप्सेमा एकैपटक ८८ अंकको पहिरो गएको देखिने त कहिले टीएमएसमा खरिद-बिक्री अर्डर नै नदेखिने समस्याबीच आज (बुधबार) को कारोबार बन्द भएको छ ।

१३ अंकको वृद्धिसहित २६००.३३ अंकमा खुलेको नेप्से उतारचढावबीच १२.५६ अंकले बढेर २४९९.०८ अंकमा बन्द भएको छ । नेप्सेको सिस्टममा सुनियोजित रुपमा समस्या देखाइएको आरोप लगानीकर्ताले लगाए पनि नेप्सको अनलाइन कारोबार प्रणालीको व्यवस्थापन गरिरहेको वाईकोले भने इन्फ्रास्ट्रक्चर बैंकको सेयर एकैपटक अत्यधिक बिक्री चाप आउँदा सिस्टममा समस्या आएको बताएको छ ।

बैंकको सेयर मूल्यमा देखिएको उतारचढावले पनि चलेखेल भएको पुष्टि हुने लगानीकर्ताहरूको दाबी छ । प्रतिनिधिसभा विघटन उल्ट्याउने सर्वोच्चको निर्णयसँगै आज बजारमा चम्किने अपेक्षमा रहेका लगानीकर्ता सिस्टममा आएको समस्याले निराश भएका छन् । 

उतारचढावबीच सेयर बजारमा आज हाइड्रोपावर र अन्यबाहेक सबै उपसूचकमा हरियाली देखिएको छ । हाइड्रोपावर उपसूचक १.११ प्रतिशत र अन्य उपसूचक ०.५१ प्रतिशतले घटेको छ ।

यता होटेल उपसूचक सर्वाधिक २.३ प्रतिशतले बढ्दा निर्जीवन र जीवन बिमा तथा म्युचुअल फन्ड उपसूचक १ प्रतिशतभन्दा माथिले बढेको छ भने बैंकिङ उपसूचक पनि ०.८१ प्रतिशतले बढेको छ ।

नेप्सेको सिस्टममा समस्या हुँदा लगानीकर्तामा देखिएको अन्योलले कारोबार रकम भने घटेको छ । आज नेप्सेमा ६९ हजार ९९४ कारोबारमा २०४ कम्पनीको एक करोड ६७ लाख २६ हजार ४७२ कित्ता सेयर किनबेच हुँदा ६ अर्ब ७० करोड १८ लाख ७२ हजारको कारोबार भएको छ ।

आज बजारमा कारोबार रकमको नेतृत्व भने नेपाल बैंकले गरेको छ । बैंकको सर्वाधिक करिब १२ लाख ३५ हजार कित्ता सेयर किनबेच हुँदा ५८ करोड २५ लाख ७६ हजारको कारोबार भएको छ । नेपाल बैंकलाई पछ्याउँदै नेपाल इन्फ्रास्ट्रक्चर बैंकको नौ लाख ९२ हजार २०७ कित्ता सेयर किनबेच हुँदा ५६ करोड ४२ हजारको कारोबार भएको छ ।

आज नेप्सेमा आईएमई जनरल इन्स्योरेन्स, चन्द्रागिरि हिल्स र नेपाल फाइनान्सको सेयर मूल्यमा सकारात्मक सर्किट लाग्दा नेपाल बैंकको सेयर मूल्य पनि पाँच प्रतिशतमाथिले बढेको छ । सेयर मूल्य घट्नेमा भने नेपाल इन्फ्रास्ट्रक्चर बैंकका साथै हाइड्रोपावर कम्पनी छन् । इन्फ्रास्ट्रक्चर बैंकको सेयर मूल्य पाँच प्रतिशतमाथिले घट्दा, अरुण भ्याली हाइड्रोपावर, आरम्भ चौतारी लघुवित्त, युनाइटेड इदी मार्दी एन्ड आरबी हाइड्रोपावर कम्पनी र शिवश्री हाइड्रोपावर छन् ।