विराटनगर । वर्षौदेखि बस्दै आएको ठाउँबाट हटाउन लागेपछि विराटनगर महानगरपालिका वडा नम्बर ३ को सुकुम्बासी परिवारले सहयोगको याचना गरेको छ । 

वडा नम्बर ३ गोग्राहा चोक(कन्या मार्ग)मा बसोबास गर्दै आएका काचिरण राजवंशीले संधियार विनयराज राजवंशीले महानगरका केही जनप्रतिनिधिसँग लागेर हटाउने प्रयास थालेको बताए । 

नेपाल पत्रकार महासंघ मोरङको सभाहलमा बुधबार पत्रकार सम्मेलन गर्न परिवारसाथ आएका राजवंशीले गत माघ ७ गते विनयले घर हटाउन भन्दै फिराद हालेको र त्यसपछि महानगरको न्यायिक समितिलेसमेत हट्न दबाब दिन थालेको सुनाए ।

७२ वर्षीया बुबा, श्रीमती, बुहारी र ४ वर्षीया नातिनी बस्दै आएको र गरिखाने मेलोसमेत राम्रो नभएकाले जर्बजस्ती घर छाड्न परे बिजोग हुने उनले बताए । भने,“बनी गरेर परिवार चल्ने गरेको, एक छोरा अंकतिसमेत नाबालक रहेकाले हामीलाई हटाउनु भयो भने त कठिन हुन्छ ।”

राजवंशी परिवार ऐलानी जग्गामा सानो टहरो बनाएर बस्दै आएको छ । कालिचरणले अहिले सरकारले नै भूमिहीन सुकुम्बासीको व्यवस्थापन गर्ने घोषणा गरेको बेला आफूहरुलाई भने अन्याय गरिएको बताए ।