काठमाडौं । सर्वोच्च अदालतले संसद् विघटनको कदम बदर गरेपछि सुरक्षा निकायलाई ‘हाइसन्चो’ भएको छ । सर्वोच्चको फैसलाअघि कस्तो आदेश आउला भन्नेमा अन्योलता थियो ।
संसद् विघटन सदर भएको अवस्थामा आन्दोलन चर्कने संकेत सुरक्षा निकायले पाएका थिए । तर, पुनःस्थापना भएपछि सम्भावित सबै आन्दोलन टरेको र आफूहरुलाई पनि सहज भएको उच्च सुरक्षा अधिकारीहरु बताउँछन् ।
यसअघि, सुरक्षा निकायलाई ‘हाई अलर्ट’मा राखिएको थियो । उच्च सुरक्षा अधिकारीले भने, “संसद् विघटनको निर्णय सदर भएको भए आन्दोलन चर्कन सक्थ्यो । स्थिति हिसांत्मक बन्ने अवस्था रहन्थ्यो । हामी पनि बल प्रयोग गर्नुपर्ने अवस्था आउन सक्थ्यौँ । अब त हाइसन्चो नै भएको भन्नुपर्छ ।”
तर, अझै पनि आफूहरु तयारी अवस्थामा बसेको उनीहरुको भनाइ छ । मुलुकको पछिल्लो राजनीतिक घटना क्रममा पूर्वानुमान गर्न गाह्रो भएको सुरक्षा अधिकारीहरु बताउँछन् । चारवोटै सुरक्षा निकायले उपत्यकाको सुरक्षामा बढी निगरानी राखेको बताइएको छ ।