काठमाडौं । नेपाली कांग्रेसका महामन्त्री शशांक कोइरालाले सर्वोच्च अदालतको प्रतिनिधिसभा विघटन बदर गर्ने फैसला स्वागतयोग्य भएको बताएका छन् । प्रतिनिधिसभा विघटन बदर गर्ने अदालतको फैसलालगत्तै विज्ञप्ति जारी गरेरै उनले फैसलाको स्वागत गरेका हुन् । 

“यो ऐतिहासिक फैसलाले स्वतन्त्र न्यायपालिका, संवैधानिक सर्वोच्चता, विधिको शासन, लोकतान्त्रिक शासन व्यवस्थामा विश्वास गर्ने आमनेपाली जनताको भरोसा टुट्नबाट जोगाएको छ,” महामन्त्री कोइरालाले भनेका छन् । आगामी दिनमा पनि न्यायालय देश र जनताको आस्थाको केन्द्र बनिरहने विश्वास पनि व्यक्त गरेका छन् । विगतमा बीपी कोइराला, गणेशमान सिंहले पञ्चायतका बेलामा पनि न्यायालयमाथि ठूलो आस्था र विश्वास देखाएको र अदालतले उनीहरूमाथि लागेको झुटा मुद्दा खारेज गरेको इतिहासको पनि स्मरण गरेका छन् ।