काठमाडौं । पुस ५ गते सरकारको सिफारिसमा विघटन भएको संसद् सर्वोच्च अदालतले ब्युँताइदिएको छ ।
सर्वोच्चको फैसलापछि अबको प्रक्रिया के हुन्छ भन्नेबारेमा धेरैको चासो छ ।
संसदीय मामिलाका जानकार तथा राष्ट्रिय सभा सदस्य राधेश्याम अधिकारीले अबको पहिलो प्रक्रिया प्रधानमन्त्रीको राजीनामा नै हुनुपर्ने बताउँछन् ।
“यदि उनले राजीनामा नदिए त्यो अनैतिक हुन्छ र पुनःस्थापित संसदले उनलाई हटाउन सक्छ,” उनले भने, “जुन संसद्ले निर्वाचित गर्यो त्यही संसद्लाई संविधान विपरीत संसद् विघटन गरेका प्रधानमन्त्रीले संसद् पुनःस्थापित भएपछि राजीनामा दिएर प्रक्रिया अघि बढाउनु नैतिक हुन्छ । उनले नैतिकता देखाएर आह्वान गरेनन् भने १३ दिनभित्र सर्वोच्चकै आदेशमा राष्ट्रपतिले संसद् डाक्नुपर्छ ।”
संसद्को नियमित प्रक्रिया आरम्भ त्यसपछि हुने उनको भनाइ छ ।
“नेपाल कम्युनिष्ट पार्टी नेकपाका दुईवटा समूहले निर्वाचन आयोगमा आधिकारिकता दाबी गरेका छन् । यसमा आयोगले निर्णय दिनुपर्ने हुन्छ,” उनले भने ।
आयोगले निर्णय गरेपछि संविधानको प्रयोग गर्न र राष्ट्रपतिलाई पनि सरकार गठन गर्न सहज हुने उनको भनाइ छ ।
त्यसपछि संसद्मा संविधानको धारा ७६ को कुन उपधाराअनुसारको सरकार बन्छ भन्ने निर्णय हुने उनले बताए ।