काठमाडौं । नेपाल कम्युनिस्ट पार्टी (नेकपा) प्रचण्ड–माधवकुमार नेपाल समूहले ६८ जिल्लाको नेतृत्व टुङ्ग्याएको छ । पार्टी विभाजनपछि रिक्त पदपूर्ति गर्न अध्यक्ष माधवकुमार नेपालको नेतृत्वमा कार्यदल बनेको थियो ।

कार्यदलले ६८ जिल्लामा भागबन्डा मिलाएको हो । आइतबार मात्रै पार्टी अध्यक्ष पुष्पकमल दाहाल प्रचण्ड र माधवकुमार नेपालले ५०–५० प्रतिशतका आधारमा भागबन्डा मिलाउने सहमति गरेका थिए ।

आज सार्वजनिक गरिएको सूचीमा काठमाडौं जिल्लाको अध्यक्षमा माधव नेपाल समूहका वसन्त मानन्धर चयन भएका छन् । सचिवमा पूर्वमाओवादी केन्द्र समूहका हिमाल शर्मा चयन भएका छन् । शर्मा यसअघि पनि सचिवकै जिम्मेवारीमा थिए । अध्यक्ष कृष्ण राई ओली समूहमा लागेपछि त्यस ठाउँमा वसन्त मानन्धरलाई ल्याइएको हो । मानन्धर प्रदेश सांसद पनि हुन् । उनी एमाले-माले विभाजन हुँदा मालेतिर लागेका थिए ।

यसैगरी वीरगन्ज महानगरको अध्यक्षमा रहबर अन्सारी नियुक्त भएका छन् । उनी यसअघि माओवादी केन्द्रका तर्फबाट वीरगन्ज महानगरको मेयरमा पनि उमेदवार बनेका थिए ।