देशमा सत्ताको चरम दुरुपयोग भइरहेको छ । प्रधानमन्त्री भएलगत्तै देखि खड्गप्रसाद शर्मा ओलीले लोकतन्त्रका मूल्य मान्यतामा त आक्रमण गरेकै थिए पछिल्ला दिनहरुमा शासकीय विधि र प्रक्रिया पनि भताभुङ्ग बनाउन थालेका छन् ।
विडम्बना, संविधानको रक्षा र पालनाको खायित्व भएकी राष्ट्रपतिले समेत सत्ताको चरम दुरुपयोगमा प्रधानमन्त्री ओलीको साथ दिएको देखिएको छ । चितवन कारागारभित्रै सँगै राखिएका बन्दीको हत्या गरेको कसुरमा सजाय पाएका सत्तारुढ दलका कार्यकर्तालाई कैद मिनाहा गरेर उन्मुक्ति दिइएको घटना सत्ता दुरुपयोगको पछिल्लो उदाहरण भएको छ ।
चितवन कारागारमा मारिएका व्यक्ति प्रमुख विपक्षी दल नेपाली कांग्रेसका कार्यकर्ता थिए । तिनका हत्याराहरु भने तत्कालीन नेकपा (एमाले) समर्थक हुन् । त्यही एमालेका अध्यक्ष ओली अहिले प्रधानमन्त्री छन् । विद्यादेवी भण्डारी राष्ट्रपति चुनिनुभन्दा पहिले एमालेकी उपाध्यक्ष थिइन् ।
भण्डारी र ओली राष्ट्रपति वा प्रधानमन्त्री हुनु समस्या होइन । तर, विधिको शासनका मूल्यमान्यतामा उनीहरूबाट भएको प्रहार भने चिन्ता र आपत्तिको विषय हो । विधिको शासनका मर्म तथा मूल्य मान्यतामा राष्ट्रपति, प्रधानमन्त्रीजस्ता राज्यको शीर्ष पदमा रहेका व्यक्तिहरूबाट यसरी आक्रमण हुनथाल्दा पनि सरकारको निगरानी गर्नुपर्ने प्रमुख विपक्षी दलका शीर्ष नेता मौन रहँदा झन् ठूलो चिन्ता र सन्देह उत्पन्न भएको छ ।
प्रतिनिधि सभा पुनःस्थापनाका विषयमा बोल्दा अदालतको अवज्ञा हुन्छ भनेर पन्छने विपक्षी नेता देउवा आफ्नै कार्यकर्ताका हत्यारालाई अदालतले दिएको सजायबाट सरकारले उन्मुक्ति दिँदा भने रहस्यमय रूपमा मौन छन् । राज्य सत्ताको चरम दुरुपयोग हुँदा पनि यसरी मौन रहेर फेरि प्रधानमन्त्री त हुन सक्लान् तर नेपाली कांग्रेसले भने यसको मूल्य नराम्ररी चुक्ता गर्नुपर्नेछ ।
राष्ट्रपति भण्डारीले ओली मन्त्रिपरिषद्का असंवैधानिक, अलोकतान्त्रिक र अन्यायपूर्ण क्रियाकलापमा सम्पूर्णरूपमा साथ दिएर राष्ट्रपति पदकै गरिमा घटाइन् । सरकारका आपराधिक क्रियाकलापको सहयोगी देखिएर विपक्षी नेता देउवा पनि नेपाली कांग्रेसलाई जनताका मात्र हैन आफ्नै पार्टीका कार्यकर्ताका आँखाबाट समेत गिरेका छन् ।
धिपधिप बलिरहेको लोकतन्त्रको दियो झ्याप्पै निभ्यो भने पनि आश्चर्य पर्दैन । यस्तो अवस्थामा प्रमुख विपक्षी नेताका हैसियतले मात्र नभई देशकै ठूलो र पुरानो लोकतन्त्रवादी दल नेपाली कांग्रेसको सभापतिका रूपमा पनि शेरबहादुर देउवाको भूमिकाप्रति व्यापक जनचासो रहेको देखिन्छ ।
राष्ट्रपति भण्डारीजस्तै विपक्षी दलका नेता देउवा पनि लोकतन्त्रको रक्षा गर्ने दायित्व पूरा गर्न असफल हुने हो भने देश अन्धकारको सुरुङमा फस्ने निश्चित छ । राष्ट्र विफल हुने लक्षण त अहिल्यै देखिन थालेको छ । सबैलाई चेतना होस् !
