काठमाडौं । स्वास्थ्य तथा जनसंख्या मन्त्री हृदयेश त्रिपाठीले कोभिड–१९ विरुद्धको खोप अभियानमा अभाव हुन नदिने बताएका छन् । भारतबाट खरिद गरिएको २० लाख डोज खोपमध्ये थप १० लाख डोज छिट्टै ल्याउने प्रक्रिया भइरहेको मन्त्री त्रिपाठीले जानकारी दिए । बाह्रखरीससँगको कुराकानीमा मन्त्री त्रिपाठीले दोस्रो चरणको खोप अभियान चलिरहँदा खोप अभाव हुन नदिने उनको दाबी छ । 
 
नेपालले खरिद गरेको २० लाख डोजमध्ये १० लाख डोज खोप आइतबार एयर इन्डियामार्फत् नेपाल आइपुगेको छ । नेपाल सरकारले भारतको सिरम इन्टिच्युट अफ इन्डियालाई फागुन ५ गते २० लाख डोज कोभिसिल्ड खोपबापत्को शुल्क रकम पठाएको थियो । सिरमले खोप उत्पादन सीमित मात्रामा भइरहेको र खरिदका लागि ८० प्रतिशत रकम पेश्कीस्वरुम पठाउनुपर्ने शर्त राखेपछि मन्त्रिपरिष्दको फागुन ४ गतेको बैठकले सार्वजनिक खरिद ऐनको प्रावधान नै निलम्बन गरेर शत प्रतिशत रकम पठाउने निर्णय गरेको थियो । सोही निर्णयअनुसार फागुन ५ गते प्रतिडोज ४ अमेरिकी डलरका दरले २० लाख डोजका लागि झन्डै ९३ कारेड रुपैयाँ भुक्तानी गरेको थियो । 

तर, २० लाख डोज खोप किन एकैपटक ल्याइएन भन्ने प्रश्नमा मन्त्री त्रिपाठी भन्छन्, “फागुन २३ गतेबाट ५५ वर्षमाथिका जेष्ठ नागरिकलाई खोप दिन्छौं र वहाँहरुलाई खोप अभियान चल्दै गर्दा थप १० लाख डोज पनि ल्याउँने तयारी छ । अहिलेलाई यति बुझौं सरकारले खोपको अभाव हुन दिँदैन ।”

२० लाख डोज खोप भण्डारणका लागि टेकुस्थित केन्द्रीय खोप भण्डारण केन्द्रलाई तयारी अवस्थामा राखिएको थियो । अन्तररष्ट्रिय विमानस्थलमा रहेको कोल्डचेनलाई समेत ब्याकअपका रुपमा राखिएको थियो । कोल्डचेन स्रोतका अनुसार यसअघि भारतबाट ल्याइएको १० लाख डोज खोपमध्ये केही खोप टेकु कोल्डचेनमै बाँकी छ । थप खोप ल्याउने मिति टुंगो लाग्दासम्म कोल्डचेन खाली गर्न मन्त्रालयको निर्देशन छ ।