काठमाडौं । नेपाली कांग्रेसका प्रवक्ता विश्वप्रकाश शर्माले प्रधानमन्त्री केपी शर्मा ओलीको विराटनगरको मन्तव्य पदीय गरिमाविपरीत भएको बताएका छन् ।
शनिबार ट्वीट गर्दै प्रवक्ता शर्माले प्रधानमन्त्री ओलीले अदालत दबाबमा नपरोस् भन्दै चर्को दबाबको अभिव्यक्ति विराटनगरको सभामा राखेको बताएका हुन् ।
‘‘न्यायालयको फैसला स्वीकार्छौँ कहिल्यै नभन्ने र चेतावनी प्रसारण गर्ने जंगे शैली लोकतान्त्रिक हुन सक्दैन,’’ उनले ट्वीटमा लेखेका छन् ।
शनिबार नेकपा ओपी समूहद्वारा विराटनगरमा आयोजित सभामा प्रधानमन्त्री ओलीले भनेका थिए, ‘‘सम्मानित सर्वोच्च अदालतले कुनै हिसाबले कसैको दबाबमा, कुनै अवाञ्छित, दबाबका दुष्प्रयासमा कुनै अन्यथा फैसला गर्छ भन्ने कल्पना गर्न सकिँदैन । म भन्न चाहन्छु, हामी अब चुनावको तयारीमा छौँ । चुनावमा जाँदै छौँ । अब अस्थिरतातर्फ मुलुकलाई फर्कन दिने होइन । फर्काउने होइन । सम्मानित सर्वोच्च अदालतले देशभरि भइरहेका यस्ता सभाहरूलाई हेरेको होला । यस्ता सभाबाट प्रकट भएको जनताको अभिमत हेरेको होला ।’’