काठमाडौं । नेपाली कांग्रेस ओखलढुंगाका महासमिति सदस्य मित्रसेन दाहालको निधन भएको छ । उनको आज बिहान काठमाडौंमा हृदयाघातबाट निधन भएको हो ।
वि.सं. २०१९ मंसिर ४ गते ओखलढुंगाको वरुणेश्वर—४ मा जन्मिएका दाहाल ०७४ सालको प्रदेशसभा निर्वाचनमा ओखलढुंगा निर्वाचन क्षेत्र नम्बर–१ को ‘क’मा कांग्रेसको तर्फबाट उमेदवार थिए ।
दाहालले नेपाली कांग्रेसद्वारा सञ्चालित वि.सं. ०४२ को सत्याग्रह र लोकतान्त्रिक आन्दोलनका क्रममा पटक–पटक गरी डेढ वर्ष जेल जीवनसमेत व्यतित गरेका थिए । साथै, दाहाल लामो समयदेखि दर्जनौँ सरकारी तथा गैरसरकारी, व्यावसायिक, सामाजिक, शैक्षिक र विविध संघ–संस्थाहरुमा संलग्न रहँदै आएका थिए ।
दाहालले ओखलढुंगाका करिब तीन हजारसहित देशभरका करिब पाँच हजार विद्यार्थीलाई छात्रवृत्तिमा पठनपाठन गराएका थिए । उनले मैत्री सेवा श्रम नामक ज्येष्ठ नागरिक ग्राम काठमाडौंको लप्सीफेदीमा बनाएका छन् । दाहालका श्रीमती, दुई छोरा र एक छोरी छन् ।
दाहालको आजै दिउँसो ३ बजे पशुपति आर्यघाटमा दाहसंस्कार गरिएको कांग्रेसले जनाएको छ ।