काठमाडौं । नेपाली कांग्रेसका सभापति शेरबहादुर देउवाले आन्दोलन गर्न आफूसँग पैसा नभएकाले अदालतको आदेश कुरिरहेको बताएका छन् । नेपाल मगर संघ गण्डकी प्रदेशको सम्मेलनको उद्घाटनका लागि पोखरा पुगेका देउवाले बिहीबार यस्तो बताएका हुन् ।

“हामीसँग पैसा पनि छैन । जबरजस्ती आन्दोलनमा बोलाउन पनि सक्दैनौं,” सभापति देउवाले भने, “क्रियाशील लिने बेलामा मारामार हुन्छ, भोलि आन्दोलनमा क्रियाशील मात्र आऊ न भन्यो भने कोही आउँदैनन् ।" देउवाले यसो भनिरहँदा विगतमा कांग्रेसले गरेका त्यति ठूला आन्दोलन पैसाकै बलमा भएका थिए ? भनेर प्रश्न उठेको छ । सँगसँगै उनको भनाइबाट पैसा लिएर मात्र जनता आन्दोलनमा सहभागी हुन्छन् त ? भन्ने प्रश्न पनि उठेको छ ।

देउवाले ‘हठात् प्रतिनिधिसभा विघटन गरेर प्रधानमन्त्री केपी शर्मा ओलीले देशलाई ध्रुवीकरणमा लगेको’ भनेर आक्रोश  पोखेका छन् । देश ‘संसद् पुन:स्थापना’को पक्ष/विपक्षमा बाँडिएको भन्दै आक्रोश पोखेका उनले यसको निकास सर्वोच्चबाटै हुने बताए ।

पैसा नभएका कारण र आफ्नै क्रियाशील सदस्यहरुसमेत आन्दोलनमा नआउने भन्दै सभापति देउवाले निरिहता प्रस्तुत गरे । उनले अदालतबाट आउने फैसला स्वीकार गर्ने र संसद् पुन:स्थापना भए सदनमा र नभए चुनावमा जाने बताएका छन् ।