काठमाडौं । नेपालमा कोभिड–१९ का कारण फागुन पहिलो साता एकजनाको मात्रै मृत्यु भएको छ । माघ पहिलो साताबाट ओरालो लागेको मृत्युदर माघ १५ गते पाँच महिनाकै कम अर्थात शून्यमा झरेको थियो । त्यसयता तीनदेखि ६ जनाको हाराहारीमा रहेको मृतकको संख्या फागुन पहिलो साता ३ गतेबाहेक लगातार शून्य छ ।
स्वास्थ्य तथा जनसंख्या मन्त्रालयले यसलाई कोभिड–१९ को नियन्त्रणमा नेपाल सफल भएको रूपमा दाबी गरेको छ । विज्ञहरुले मृत्युदर कम भए पनि जोखिम कायमै रहेको बताउँदै आएका छन् ।
पुसयताको तथ्यांक
असोजको पहिलो सातादेखि मंसिर अन्तिम साता नेपालमा कोभिड–१९ को महामारी उच्च भएको थियो । उक्त अवधिमा नेपालमा कोभिड–१९ का कारण सबैभन्दा धेरै अर्थात एक हजार ३४७ जनाले ज्यान गुमाए । त्यसपछि नेपालमा कोरोना संक्रमणका कारण ज्यान गुमाउनेको संख्या एक हजार ७३० पुग्यो । तीन महिना उच्च विन्दुमा पुगेको कोरोना संक्रमणको दर पुस लागेपछि भने घट्दै गयो । पुसको पहिलो साता सात हजारको हाराहारीमा परीक्षण भएकामा ७४२ संक्रमित भेटिए । जसमध्ये सातजनाको मृत्यु भयो । पुस ७ गते तीन महिनाकै सबैभन्दा कम तीन संक्रमितको मृत्यु भयो । पुसमा कोरोना संक्रमणका कारण १९४ जनाको मृत्यु भएकामा नयाँ संक्रमित भने १५ हजार २२२ थपिए । पुसमा सरकारले एक लाख ४७ हजार ८८३ जनाको पीसीआर परीक्षण गरेको थियो ।
त्यसैगरी, माघ महिनामा संक्रमितको संख्या पुसको तुलनामा घटेको छ । माघ ५ गतेसम्म नेपालमा कोरोना संक्रमितको संख्या दुई लाख ६७ हजार ६४४ पुगेको थियो । जसमा माघ १ देखि ५ गतेसम्म नेपालमा एक हजार १०१ जना नयाँ संक्रमित थपिए भने २२ जनाको मृत्यु भयो । माघको दोस्रो साता पनि मृतकको संख्या दैनिक दुईदेखि सातको हाराहारीमा रहेको थियो । कोरोना संक्रमणका कारण पाँच महिनायता पहिलोपटक माघ १५ गते मृतकको संख्या शून्य रह्यो । त्यसयता संक्रमितको संख्या दैनिक १३० देखि २०० को हाराहारीमा रहँदै आएको छ भने मृतकको संख्या दुईदेखि तीनको हाराहारीमा छ । माघ १५ देखि ३० गतेसम्म चारपटक अर्थात माघ महिनामा चार दिन शून्य मृत्यु पुष्टि भएको स्वास्थ्य तथा जनसंख्या मन्त्रालयको तथ्यांक छ ।
फागुन १ गते शून्य मृत्यु भए पनि ३ गते कोभिडका एकजना बिरामीको मृत्यु भएको तथांक छ । त्यस्तै, आज तीनजना संक्रमितको मृत्यु भएसँगै फागुन पहिलो साता मृतकको संख्या चार पुगेको छ । हालसम्म नेपालमा कोभिड–१९ का कारण मृत्यु हुनेको संख्या दुई हजार ५८ पुगेको छ ।
जोखिम कायमै छ, सतर्क रहनुपर्छ
कुनै समय आइसोलेसन शय्यासम्म खाली नहुने शुक्रराज ट्रपिकल तथा सरुवा रोग अस्पतालमा अहिले नौजना कोभिडका बिरामी भर्ना छन् । अस्पतालका प्रमुख कन्सल्टेन्ट डा. अनुप बास्तोलाका अनुसार पछिल्लो समय भर्ना हुने बिरामी जटिल अवस्थाका छैनन् ।
कोभिड–१९ संक्रमण उच्च विन्दुमा पुगेको समयमा मानिसहरु संक्रमण छिप्पिइसकेपछि मात्रै भर्ना हुन आएकाले धेरैको मृत्यु भएको उनको अनुभव छ । समुदायस्तरमा संक्रमण नियन्त्रणमा भएकाले मृत्युदर पनि घटेको डा. बास्तोला बताउँछन् । तर, भाइरसले आफनो रूप परिवर्तन गर्दै गएकाले संक्रमणको जोखिम भने कयमै रहेको उनी बताउँछन् । कोभिड–१९ विरुद्धको खोप लिइसकेका व्यक्तिले पनि मास्क लगाएर हिँड्न र सामाजिक दूरी भने कायमै राख्न डा. बास्तोलाको सुझाव छ ।