काठमाडौं । सरकारले कोभिड–१९ विरुद्धको २० लाख डोज खोप खरिद गर्ने निर्णय गरेको छ ।

मंगलबार बेलुका बसेको मन्त्रिपरिषद् बैठकले सार्वजनिक खरिद ऐनका केही दफा निलम्बन गरेर खोप ल्याउने र भुक्तानी प्रक्रिया सहज गराएको जनाएको छ ।

सार्वजनिक खरिद ऐनअनुसार खरिद सम्झौतापश्चात २० प्रतिशतभन्दा बढी दिन नपाइने गरी पेस्की दिन सकिने छ । तर सिरमले सरकारसँग पछि रकम लिन झन्झटिलो हुने हुँदा अग्रिम भुक्तानी भए मात्र खोप दिने सर्त राखेपछि दफा निलम्बन गर्नुपरेको स्रोतले जनाएको छ ।

थप ४० लाख जनतालाई पुग्ने खोप खरिदका लागि भारतको सिरम इन्स्टिच्युट अफ इन्डिया र अन्य विभिन्न कम्पनीसँग जिटुजी प्रक्रियामार्फत् प्रक्रिया अघि बढाइएको स्वास्थ्य तथा जनसंख्या मन्त्रालयले जानकारी दिएको छ । 

नेपालमा २० लाख डोज खोप भारतबाटै ल्याउने लक्ष्यका साथ सरकारले प्रक्रिया अघि बढाएको स्वास्थ्य तथा जनसंख्या राज्यमन्त्री नवराज रावतले बताए । 

खोप शूल्कबारे नेगोसिएसन भइरहेको छ 

अहिले प्रयोग भइरहेकै कोभिशिल्ड खोप खरिदका लागि स्वास्थ्य तथा जनसंख्या मन्त्रालयले भारतको सिरम इन्स्टिच्युट अफ इन्डियासँग पत्राचार गरेको थियो । 

प्रतिडोज ४ डलरका दरले सिरमले २० लाख डोज खोप उपलब्ध गराउन सक्ने तर खोप शूल्कको ८० प्रतिशत रकम पेश्कीस्वरुप उपलब्ध गराउनुपर्ने शर्त राखेपछि स्वास्थ्य मन्त्रालयले यो प्रस्ताव मन्त्रिपरिषद्मा लगेको थियो ।

मन्त्रालयका प्रवक्ता डा. जागेश्वर गौतम भन्छन् “अहिले यही कम्पनीबाट ल्याउने भन्ने निश्चित भएको छैन, केही कम्पनीले ८० प्रतिशत पेश्की रकम माग गरेका छन् भने केहीले त्योभन्दा कम पनि मागेका छन् । अहिले तिनै कम्पनीहरुबीच नेगोसिएसनको काम हामी गरिरहेका छौं ।” 

तर कृषि मन्त्री पद्मा अर्यालले बाह्रखरीसँग कुरा गर्दै भारतबाट खोप खरिद गर्ने निर्णय गरिएको बताएकी छन् ।

‘खोप खरिदका लागि आवश्यक रकमको व्यवस्था गरिसकिएको र आवश्यक परेको जुनसुकै समयमा उपलब्ध गराइने’ अर्थ मन्त्रालयका प्रवक्ता रामप्रसाद घिमिरेले बताए । 
 

दोस्रो डोज खोप दिने समयसम्म थप खोप ल्याउने 

कोभिड १९ विरुद्धको खोप पहिलो चरणको अभियान माघ १४ गते सुरु गरिएको थियो । दोस्रो डोज खोप भने फागुन २४ गतेबाट दिने योजना स्वास्थ्य तथा जनसंख्या मन्त्रालयले  गरेको छ । 

‘दोस्रो डोज खोप दिन सुरु गर्दासम्म थप २० लाख डोज खोप ल्याइसक्ने’ स्वास्थ्य तथा जनसंख्या राज्यमन्त्री नवराज रावतले बताएका छन् । 

कोभ्याक्स कार्यक्रमअन्तर्गत नेपालमा मार्चको पहिलोसाता खोप आउने योजना भएपनि त्यसअघि सरकारले नै खोप खरिद गरेर ल्याउने राज्यमन्त्री रावतले दाबी गरे । 

दोस्रो चरणको प्राथमिकतामा को को ? 

कोभिड १९ विरुद्धको खोप अभियानअन्तरगत दोस्रो चरणको प्राथमिकतामा सरकारले ५५ वर्षमाथिका ज्येष्ठ नागरिक र ४५ वर्षमाथिका दीर्घरोगीलाई राखेको छ । 

खोप विभाग प्रमुख डा. झलक शर्मा गौतमले ‘कोभिड १९ बाट मृत्यु हुनेमा सबैभन्दा बढी यी दुई वर्गका नागरिक परेकाले अबको चरणमा ज्येष्ठ नागरिक र दीर्घरोगीलाई खोप दिने प्राथमिकतामा राखिएको’ बताए । 

यसअघि पहिलो चरणको १० लाख डोज खोप अभियानअन्तर्गत आइतबारसम्म २ लाख २४ हजार ५२० जनालाई ५ लाख डोजभन्दा बढी खोप दिइएको छ ।