काठमाडौं । देशव्यापी अन्तर वडा टेबलटेनिस प्रतियोगिता चैत पहिलो साता हुने भएको छ ।
स्पिन इभेन्ट्स प्रालिले मंगलबार पत्रकार सम्मेलन गरेर चैत २ देखि ७ गतेसम्म प्रतियोगिता सञ्चालन गर्ने बताएको हो । अखिल नेपाल टेबलटेनिस संघको प्राविधिक सहयोग साथै वार्षिक कार्यक्रमअन्तर्गत रहेको प्रतियोगिता लैनचौरस्थित राष्ट्रिय टेबलटेनिस प्रशिक्षण केन्द्रमा हुनेछ । प्रतियोगितामा देशभरका वडाबाट कम्तिमा हजार खेलाडीको सहभागिता रहने आयोजकले बताएको छ ।
प्रतियोगितामा मेन्स युगल, वुमेन्स युगल टिम, वुमेन्स युगल, मेन्स एकल, वुमेन्स एकल, मेन्स भेट्रान एकल (४० वर्षमाथि) र मेन्स भेट्रान्स एकल (५५ वर्षमाथि) को स्पर्धामा प्रतिस्पर्धा हुनेछ ।
प्रतियोगितामा वर्तमान शीर्ष १६ वरीयता प्राप्त टेबलटेनिस खेलाडी बाहेकका अन्य खेलाडीहरूले भाग लिन सक्नेछन् । प्रतियोगिताको मेन्स र वुमेन्स एकलतर्फ प्रथम, द्वितीय र तृतीय (दुवै सेमी-फाइनलिस्ट) हरूले क्रमशः ३० हजार, १५ हजार र ७ हजार ५ सय रुपैयाँ नगद पुरस्कार पाउनेछन् । भेट्रान्स एकलतर्फ प्रथम, द्वितीय र तृतीय (दुवै सेमी-फाइनलिस्ट) हरूलाई क्रमशः १० हजार, ५ हजार र २ हजार ५ सय प्रदान गरिने आयोजकले जानकारी दियो ।
त्यस्तै प्रतियोगितामा सर्वाधिक पदक जितेर टिम च्याम्पियन बन्ने वडालाई ५० हजार प्रदान गरिनेछ । भ्याली कन्स्ट्रक्सन प्रालिको मुख्य प्रायोजन रहने प्रतियोगिताको अनमानित लागत १९ लाख ५० हजार छ ।
मंगलबारै स्पिन इभेन्ट्सका अध्यक्ष सुमन शाक्य र भ्याली कन्स्ट्रक्सनका एमडी रवीन्द्र महर्जनले प्रायोजक सम्झौतापत्रमा हस्ताक्षर गरे । सम्झौताअनुसार भ्याली कन्स्ट्रक्सनले आयोजकले ९ लाख ७५ हजार उपलब्ध गराउनेछ ।