काठमाडौं । महिला कानुन व्यवसायीहरुले भागरथी भट्ट घटनाको प्रभावकारी अनुसन्धान गरी अपराधीलाई कारबाही गर्न माग गर्दै गृहमन्त्री रामबहादुर थापालाई ज्ञापनपत्र बुझाएका छन् ।
नेपाल बार एसोसिएसन महिला समितिका पदाधिकारीहरुले मंगलबार गृहमन्त्री थापालाई भेट गरी बैतडीको दोगडाकेदार ३ मा भागरथीलाई बलात्कार गरी हत्या गर्ने हत्यारामाथि अनुसन्धान गरी कानुनी दायरामा ल्याई पीडित र उनका परिवारलाई न्याय दिलाउन माग गरेका हुन् ।
एसोसिएसनका उपाध्यक्ष एवं नेपाल बार एसोसिएसन महिला समिति अध्यक्ष अधिवक्ता रक्षा बस्यालले भागरथीको घटनालगायत देशव्यापी रुपमा भएका बलात्कारका घटनाहरुको सूक्ष्म अध्ययन गरी अपराधीलाई कारबाही गर्न माग गरिएको बताइन् । भेटमा गृहमन्त्री थापाले भागरथी घटनाको अनुसन्धान अपराधीनजिक पुगेको र अपराधीहरु छिटै पक्राउ पर्ने विश्वास दिलाउन कोसिस गरेको बस्यालले बताइन् ।
महिला कानुन व्यवसायीहरुले निर्मला पन्तको घटनामा जस्तो कमजोर अनुसन्धान नगर्नसमेत गृहमन्त्री थापासमक्ष माग गरेका छन् । बालबालिका तथा महिलाहरुमाथि भइरहेको शृंखलाबद्ध बलात्कारको घटना, बलात्कारपछिको हत्या र बलात्कारीलाई कानुनी कारबाहीमा ल्याउनुको साटो बलात्कारी र हत्यारा पत्ता लगाउनै नसक्नुले राज्यसंयन्त्र नागरिकको जीवनरक्षाको दायित्वप्रति लापरबाही भएको पुष्टि भएकोसमेत महिला कानुन व्यवसायीहरुले बताएका छन् ।
