काठमाडौं । राष्ट्रिय खेलकुद परिषद् (राखेप)ले थप दुईवटा पूर्वाधार निर्माण गर्ने सम्बन्धमा स्थानीय उपभोक्ता समितिसँग सम्झौता गरेको छ ।
गण्डकी प्रदेशस्तरीय खेलकुद अभिमुखीकरण कार्यक्रमका दौरान राखेप सदस्यसचिव रमेशकुमार सिलवाल र लामाचौर खेलमैदान उपभोक्ता समितिका सचिव बुद्धिबहादुर खत्रीबीच सम्झौता भएको हो ।
पोखराको लामाचौरमा निर्माणधीन कर्भहलको भीआईपी प्यारापिटको वाल निमार्णका लागि राखेपले १० लाख रुपैयाँ उपलब्ध गराउने भएको छ । ३० मिटर लम्बाइ र १२ मिटर चौडाइ भएको प्यारापिटको दर्शक क्षमता एक हजार रहेको छ । निर्माण सम्पन्न भएको नेचुरल प्यारापिटतर्फ भने कभर्डहलमा पाँच हजार दर्शक अट्ने क्षमता रहेको छ ।
त्यसैगरी, स्याङ्जाको वालिङ खेलमैदानको प्याराफिट र प्याराफिटमुनि रहेको खेलाडी चेन्जिङ रुम निर्माणका लागि राखेपले १० लाख उपलब्ध गराउने भएको छ । सोमबार सदस्यसचिव सिलवाल र वालिङ खेलमैदान उपभोक्ता समितिका अध्यक्ष केशरबहादुर थापाबीच सम्झौता भएको हो । आइतबार राखेपले गण्डकी प्रदेशका नौ पूर्वाधार निर्माणका लागि सम्झौता गरेको थियो ।