काठमाडौं । गैरआवासीय नेपाली संघ (एनआरएनए) अन्तर्गतको स्वास्थ्य समिति तथा वैदेशिक रोजगार तथा कल्याण विभागको संयुक्त प्रयासमा विश्वव्यापी विस्तृत टेली-हेल्थ सेवा सुरु भएको छ ।
गत शुक्रबारदेखि सुरु भएको यो सेवाबाट विश्वका कुनै पनि ठाउँमा बसोबास गर्ने नेपाली मूलका कुनै पनि व्यक्तिले लाभ लिन सक्नेछन् । यस कार्यक्रममा सबै क्षेत्र र विधाका स्वास्थ्य विशेषज्ञ र चिकित्सकहरु सहभागी छन् ।
मिर्गौला, कलेजो, मुटु, आँखा, नाक, कान, घाँटी तथा मुखसम्बन्धी स्वास्थ्य विज्ञदेखि डाइटिसियन र फिजियोथेरापिस्ट, दन्त चिकित्सकलगायत अन्य थुप्रै स्वास्थ्य विज्ञहरुले जिज्ञासा वा समस्याको सम्बोधन गर्ने संघले विज्ञप्तिमार्फत जनाएको छ ।
टेली-हेल्थ कार्यक्रमबाट कसरी सेवा लिने ?
तपाईंले आफ्नो मोबाइलमा रहेको भाइबर, ह्वाट्सएपमार्फत टेली-हेल्थ कार्यक्रममा सहभागी हुन वा यसमार्फत स्वास्थ्य विज्ञहरु सँग प्रत्यक्ष सम्पर्क गर्न सकिने संघले जनाएको छ । त्यसका लागि नेपालबाहिर भए ९७४-५५५-६५३२० वा ९७७ ९८०-२३१-४७३९ र नेपालभित्र भए मोबाइल नम्बर ९८०२३१४७३९ मार्फत सम्पर्क गर्न सकिनेछ । साथै telehealth@nrna.org मा इमेलमार्फत आफ्ना स्वास्थ्य जिज्ञासा लेखेर पठाउन सकिनेछ ।
टेली-हेल्थ कार्यक्रमबाट सेवा प्राप्त गर्न शुल्क लाग्छ ?
यस कार्यक्रमार्फत सेवा लिए बापत कुनै पनि शुल्क लाग्दैन ।
