काठमाडौं । नक्कली डाक्टर बनी सिफारिस गरेको आरोपका एकजना पक्राउ परेका छन् । पक्राउ पर्नेमा काठमाडौं महानगरपालिका ३, कान्ति संगममार्ग बस्ने अर्घाखाँची मालारानी गाउँपालिका ८, घर भएका ३६ वर्षीय जितेन्द्र पन्थी छन् ।
नेपाल मेडिकल काउन्सिलबाट लिनुपर्ने स्थायी दर्ता प्रमाणपत्रको लागि निवेदन दिने क्रममा नियमअनुसार आवेदन फाराम भरेपछि फारामको अन्त्यमा काउन्सिलमा स्थायी दर्ता भएका चिकित्सकले दस्तखत गरी प्रमाणित गरी दिनुपर्ने प्रक्रिया रहेकामा अर्को चिकित्सकको नाम देखिएपछि प्रहरीले अनुसन्धानअघि बढाएको थियो ।
गत असोज ६ गते डा. कृष्ण रिजालको निवेदन फारममा जितेन्द्रले डा. जितेन्द्र शर्मा, एनएमसी रजिस्ट्रेसन नम्बर २३६४ लेखी सहीछाप गरेकामा किर्ते गरेको शंका लागेर अनुसन्धान गर्ने क्रममा उनले नेपाल मेडिकल काउन्सिलबाट लाइसेन्स प्राप्त नगरी सहीछाप गरेको खुल्न आएपछि उनलाई प्रहरी प्रधान कार्यालय केन्द्रीय अनुसन्धान ब्युरोबाट खटिएको प्रहरीले पक्राउ गरेको हो ।
उनीविरुद्ध सम्बन्धी कसुरमा जिल्ला अदालत काठमाडौंबाट म्याद थप अनुमति लिई अनुसन्धान भइरहेको ब्युरोले जनाएको छ ।