काठमाडौं । नेपाली कांग्रेसका सहमहामन्त्री डा. प्रकाशशरण महतले कांग्रेस कम्युनिष्ट शासन अन्त्यको हतारोमा रहेको बताएका छन् । प्रतिनिधिसभा विघटन विरुद्धभन्दै गरेको कार्यक्रममा सिरहाको सभालाई संबोधन गरेका महतले कांग्रेस पुनस्थापना र निर्वाचन दुबैका लागि तयार रहेको बताए ।

“म संविधान मस्यौदा समितिको सदस्य थिए –संविधानसभामा । स्थिरताका लागि दुई वर्षसम्म अविश्वास प्रस्ताव लैजान नपाउने, ५ वर्ष प्रतिनिधिसभाको कार्याकाल हुने व्यवस्था गरेकै हो । तर, ओली सरकारले प्रतिनिधिसभा विघटन गरिदिएको छ,” महतले भने ।  उनले आफूहरुले संविधानमै लेखेर संविधानको व्याख्या गर्ने अधिकार सर्वोच्च अदालतलाई दिएको भन्दै सर्वोच्चले गर्ने जुनसुकै फैसला मान्नुपर्ने बताए ।

“अहिले प्रतिनिधिसभा विघटनको विषय सर्वाेच्च अदालतमा छ । हामीले नै संविधानमा लेखेर संविधान व्याख्याको अधिकार अदालतलाई नै दिएका हौं,” महतले भने, “सर्वोच्चले ओलीको कदम बदर गरिदियो भने संसदमा जानुपर्छ, कम्युनिष्टको कुशासन अझै केही समय झेल्नुपर्छ । यदि सर्वोच्चले प्रतिनिधिसभा विघटन सदर गरिदियो भने हामी निर्वाचनका लागि तयार भएर बस्नुपर्र्छ ।”

उनले निर्वाचनबाट कम्युनिष्ट सरकार र कम्युष्टि शासन दुबैको अन्त्य गर्न कांग्रेस आतुर रहेको बताए ।