विराटनगर । नेपाली कांग्रेसका नेता तथा पूर्वअर्थमन्त्री महेश आचार्यले एउटा मुद्दा सर्वोच्च अदालतमा र अर्को मुद्दा जनताको इजलासमा चलिरहेको बताएका छन् ।

लाखौंको संख्यामा जनता सडकमा ओर्लिएका छन् । संविधानविपरीत विघटन गरेको प्रतिनिधिसभा पुन:स्थापित गर्न याचना गर्न होइन बरु संविधानको रक्षार्थ जनतामाझ कांग्रेस आएको बताए । उनले भने, "हामी सर्वोच्च अदालतको बहसलाई पनि सूक्ष्म ढंगले हेरिरहेका छौं । जनताको अदालततिर पनि हेर्दै छौं ।" उनले जनताको अदालतमा प्रधानमन्त्रीको कदमको फैसला हुने स्पष्ट गरे ।

आचार्यले प्रधानमन्त्रीले देशका संयन्त्रलाई कम्युनिस्टकरण गर्न र प्रचण्ड-माधव नेपाल उत्तिकै जिम्मेवार रहेको बताए । बलात्कारीलाई कारबाही गर्नुको साटो अपराधी लुकाउने काम भएको र अनियमितता गर्नेलाई बचाउने काम भएको आरोप लगाए । प्रधानमन्त्रीले सरकारी खर्च गरेर पार्टीको विवादमा झगडिया भएर सडकमा गएको बताए ।

यस्तै कांग्रेस केन्द्रीय सदस्य अमृत अर्यालले नेकपाका दुवै समूहले भाडामा ओसारे जसरी कांग्रेसको भेलामा जनसमुदाय भेला नभएको बताए । उनले भने, "अब देशले कांग्रेस खोजेको छ । एमाले र माओवादी सच्चिएर आउलान् भनेको त्यो भएन ।" तीन वर्षअघि नै कांग्रेसले भनेको थियो छोरी र कोदो मिल्दा तेल ननिस्कनेजस्तै नेकपाले चुनाव जितेर जनता र देशलाई धोका दिएको बताए । अर्यालले प्रतिगमनको विरोध गरिरहने र अदालतको निर्णयसमेत पर्खिएर त्यसलाई सम्मान गर्ने बताए ।

अर्यालले सबै परिवर्तनको आत्मसात गर्ने पार्टी कांग्रेस मात्र भएको बताउँदै भने, "संविधानलाई अब कानुनत स्थापित गर्ने काम अब कांग्रेसले गर्छ ।" ७० वर्षको आन्दोलनको बलमा ल्याएको संविधान र गणतन्त्र नेकपाले अढाइ वर्षमा निमोठेको बताए । कांग्रेसले प्रतिगमन नसच्चिएसम्म संघर्ष गरिरहने स्पष्ट गरे ।

कांग्रेस केन्द्रीय सदस्य तथा उद्योगी पवन शारडाले संविधानविपरीतको कदमले सबै क्षेत्रमा असर गरेको बताए । उनले भने, "सरकारले औद्योगिक क्षेत्रका लागि झन् संकटमा लगेको छ ।"

यस्तै उप-प्राध्यापक इन्दिरा प्रसाईंले संविधानको कुनै पानामा नलेखिएको कुरा गरेको गरेर जनताले स्थापित गरेको गणतन्त्र नै जोखिममा पारिदिएको बताइन् । उनले भनिन्, "आफ्ना गुणगान गाउनेलाई संवैधानिक नियुक्ति दिन थालेका छन् ।"

नेपाली कांग्रेस मोरङका सभापति डिगबहादुर लिम्बूले संघीय गणतन्त्र समाप्त गर्ने दिशामा ओली सरकार लागेको बताए । उनले भने," कम्युनिस्टले देश चलाउन सकेन अब राष्ट्रव्यापी आन्दोलन उठाउन जरुरी छ ।" विराटनगरका विभिन्न स्थानबाट निस्किएका र्‍याली महेन्द्र चोकमा पुगेर विरोधसभामा परिणत भएको थियो ।