काठमाडौं । नेपाली कांग्रेसका नेता प्रकाशमान सिंहले कांग्रेसको नेतृत्वमा ल्यारएको संविधान उल्लंघन हुँदा टुलुटुलु हेरेर नबस्ने बताएका छन् । प्रतिनिधिसभा विघटनविरुद्ध ७७ जिल्लामा विरोधसभा गरेको कांग्रेसको कास्कीको सभालाई सम्बोधन गर्दै उनले यस्तो बताएका हुन् । ओलीले, प्रतिनिधिसभासँगै लोकतन्त्र र संविधानलाई पनि प्रहार गरेको सिंहको दाबी छ ।
“७० वर्षको नेपाली जनताको चाहनाअनुरुपको संविधान नेपाली कांग्रेसको नेतृत्वमा जारी भएको हो, त्यसकारण संविधान रक्षका लागि अरुको भन्दा कांग्रेसकै दायित्व बढी छ,” सिंहले भने, “त्यो संविधानमा प्रधानमन्त्रीले धावा बोलेका छन्, त्यसलाई राष्ट्रपतिले पनि साथ दिँदा संविधान समाप्त हुने खतरा बढेको छ ।” उनले यस्तो भइरहँदा कांग्रेस टुलुटुलु् हेर्न नसक्ने भएकैले देशव्यापी आन्दोलनमा रहेको बताए ।
सिंहले न्यायमूर्तिहरुले देशको संविधानअनुसार नै फैसला गर्ने भन्दै प्रधानमन्त्रीको कदम सर्बोच्चबाट सच्चिने विश्वास व्यक्त गरे ।
“न्यायमूर्तिहरु नेपालको संविधानअनुसार नियुक्त हुनुभएको हो र प्रतिनिधिसभा विघटनमा पनि उहाँहरुले नेपालकै संविधान हेरेर फैसला गर्नुहुन्छ भन्ने विश्वास छ,” सिंहले भने, “सेटिङ गरेको छुँ भन्नेहरुलाई पनि अब न्यायमूर्तिहरुकै फैसलाबाट जवाफ मिल्नेछ ।” न्यायलयमा जाने न्यायाधीशले व्यक्तिगत धर्मिक आस्थासमेत छाडेर सबैलाई न्याय गर्नुपर्ने भन्दै कसैको सेटिङबाट न्यायलय र न्यायमूर्ति प्रभावित नहुने बताए ।