चितवन । नेपाली कांग्रेसका युवा नेता गगन थापाले बहुमत प्राप्त प्रधानमन्त्रीले संसद् विघटन गर्ने कुनै अधिकार नभएको बताएका छन । चितवनमा आज नेपाली कांग्रेसद्धारा आयोजित विरोधसभालाई सम्बोधन गर्दै उनले भने, "बहुमत प्राप्त प्रधानमन्त्रीले मन लागे घर जान पाउँछ, वन जान पाउँछ संसद् विघटन गर्न पाउँदैन । घर बनाउन कला बदल्न सकिन्छ तर जग बदल्न मिल्दैन ।"

नेता थापाले देशको यस्तो अवस्थामा अदालतले केपी ओली र प्रचण्डको भेला मात्रै नहेरेर अदालतको धर्म निर्वाह गर्नुपर्ने बताए । "जबसम्म अदालत स्वतन्त्र हुँदैन तबसम्म कांग्रेसले हस्ताक्षर गर्दैन । मेरो अदालत प्रधानमन्त्रीको धम्कीबाट नडराओस् । कसैको भेला नहेरोस् । संविधानको धारा मात्र हेरोस् ।"

पहिले पहिले जनताले राजा महाराजाको सवारी हेर्ने गरेको बताउँदै उनले ओलीलाई भने, "यसैगरी ओली कहिले चितवन, दाङ, बुटवल सवारी गरिरहेका छन् । भ्रममा नपर्नुस् प्रधानमन्त्रीज्यू जनता तपाईको भेलामा कमेडी सुन्न आएका हुन् ।" केपी ओलीलाई अब श्री ५ महाराजालाई सम्झाएजस्तै सम्झाउनुपर्ने थापाले बताए । प्रधानमन्त्रीले चुनाव गर्ने नाटक गरेको भन्दै उनले चुनाव कुनै हालतमा नहुने जिकिर गरे ।