काठमाडौं । नेपाली कांग्रेसका वरिष्ठ नेता रामचन्द्र पौडेलले स्ववियु निर्वाचन माग गर्दै त्रिभुवन विश्वविद्यालय केन्द्रीय क्याम्पस कीर्तिपुरमा १२ दिनदेखि जारी रिले अनशनमा ऐक्यबद्धता जनाएका छन् । अनशनमा ऐक्यबद्धता जनाउन पौडेल नेपाल विद्यार्थी संघका नेता, कार्यकर्ता अनशन बसिरहेको स्थान कीर्तिपुर पुगेका थिए ।
अनशनमा ऐक्यबद्धता जनाउँदै नेता पौडेलले आफूहरुले स्थापित गरेको स्वतन्त्र विद्यार्थी नियनलाई बचाउने जिम्मेवारी नेविसंघको भएको बताए । कम्युनिस्टका कारण स्ववियुको अस्तित्व नै संकटमा परेको भन्दै उनले विद्यार्थीहरुले उठाएको माग जायज भएको बताए । शैक्षिक सुधारका लागि विद्यार्थीले सुरु गरेको सत्याग्रहमा आफ्नो साथ रहेको भन्दै पौडेलले विद्यार्थीले उठाएका माग सम्बोधन गर्न पनि माग गरे ।
स्ववियु निर्वाचन तत्काल घोषणा हुनुपर्नेलगायत पाँचबुँदे माग राख्दै नेविसंघले रिले अनशन जारी राखेको छ । नेता पौडेलसँगै कांग्रेस नेता राजन केसी पनि पुगेका थिए ।
नेविसंघले विश्वविद्यालयलाई प्राज्ञिक क्षेत्र बनाइनुपर्ने, विश्वविद्यालयको स्वायत्तता कायम गरिनुपर्ने, समयानुकूल शैक्षिक प्रणाली र गुणस्तरमा केन्द्रित हुनुपर्छ र स्ववियुको निर्वाचन सुनिश्चितता गरिनुपर्छ माग राखेर अनशन गरिरहेको र माग पूरा नभएसमम जारी रहने नेविसंघका नेता भुवन भट्टले जानकारी दिए ।