काठमाडौं । लागुऔषध नियन्त्रण ब्युरोले लागुऔषध कारोबारमा संलग्न नौजना जनालाई पक्राउ गरेको छ ।
लागुऔषध ब्युरोको टोलीले माघ २१ देखि २६ गतेसम्म गरेको कारबाहीका क्रममा काठमाडौं उपत्यकाका विभिन्न स्थानबाट पक्राउ परेका लागुऔषध कारोबारमा संलग्न नौजनालाई आइतबार पत्रकार सम्मेलन गरी सार्वजनिक गरेको हो ।
उनीहरुलाई लागुऔषध एम्फेटामाइन २२२ ग्राम र नियन्त्रित लागुऔषध २४ सय ७० एम्पुलसहित पक्राउ गरिएको प्रहरी वरिष्ठ उपरीक्षक दिलीप चौधरीले जानकारी दिए । उनीहरुको साथबाट डाइजेपाम ९२८ एम्पुल, बुप्रेनोर्फिन ७८२ एम्पुल, फेनारगन-६८४ एम्पुल, लुपिजेसिक-७६ एम्पुल गरी कुल नियन्त्रित लागुऔषध २४ सय ७० एम्पुल र नगद ९० हजार पाँच सय रुपैयाँ बरामद गरेको उनले जानकारी दिए ।
पक्राउ परेका व्यक्तिहरुले एउटै सन्जाल निर्माण गरी कारोबार गर्ने गरेको प्रहरीले जनाएको छ ।