बीबीसी । गएको जनवरी ६ तारिखका दिन अमेरिकी संसद् भवनमा भएको हिंसात्मक आक्रमणका लागि जिम्मेवार ठहर्‍याइएका पूर्वराष्ट्रपति डोनाल्ड ट्रम्पविरुद्ध सिनेट ट्रायलमा आवश्यक बहुमत प्राप्त नपुगेपछि उनी फेरि पनि दोषमुक्त भएका छन् ।

ट्रम्पविरुद्ध महाअभियोगको पक्षमा ५७ सिनेटरहरुले मत हाले । जसमा सात रिपब्लिकन पनि रहेका थिए । तर, उनलाई आधिकारिक रूपमा दोषी ठहर गर्न ६७ मत आवश्यक थियो ।

यस्तोमा ‘ट्रायल’ सकिएपछि आफ्नो बयानमा ट्रम्पले यो मुद्दालाई इतिहासकै सबैभन्दा ठूलो ‘विच हन्ट’को संज्ञा दिएका छन् । यो ट्रम्पविरुद्धको दोस्रो महाअभियोग मुद्दा थियो । यदि, यसमा उनी दोषी ठहर भएको भए उनले भविष्यमा कहिल्यै चुनाव लड्न पाउने थिएनन् ।

मतदानपछि वरिष्ठ रिपब्लिकन सिनेटर मिच मेककोनेलले क्यापिटल हिंसाका लागि ट्रम्प नै जिम्मेवार भएको र सो घटना ‘शर्मनाक रुपमा कर्तव्यको अवहेलना’ भएको बताए ।

उता, डेमोक्रेट्सहरुले पनि आफ्नो ट्रम्पलाई दोषमुक्त गराउनु खतरनाक हुनसक्ने चेतावनी दिएका छन् । यसअघि, ट्रम्प आफैँले पनि अहिलेसम्म कुनै राष्ट्रपति यस किसिमका घटनाबाट गुज्रिनु नपरेको तर यो अभियान अमेरिकालाई महान् बनाउने सुरुवात मात्र भएको बताएका थिए । जसले उनी फेरि चुनाव लड्न सक्ने संकेत दिन्छ ।