काठमाडौं । नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले लामो संघर्षबाट प्राप्त उपलब्धि रक्षाको निम्ति एक भएर प्रतिवाद गर्नुपर्ने बताएका छन् ।
शनिबार पूर्वप्रधानमन्त्री तथा जनता समाजवादी पार्टी (जसपा) नेपालका अध्यक्ष डा. बाबुराम भट्टराईद्वारा लिखित पुस्तक ‘गुमनाम आमाहरुको कथा’को लोकार्पण कार्यक्रममा बोल्दै उनले संघर्ष र बलिदानीबाट प्राप्त उपलब्धिमाथि हमला भएकोले उल्लेख गरे । यसको निम्ति मोर्चा खोलिसकिएको उनको भनाइ छ ।
उनले नेपालको संविधान पूर्ण छ भनेर आफूले दाबी नगरेको भन्दै नेपालको संविधानले समावेशी लोकतन्त्रको सवालमा राम्रो व्यवस्था गरेको बताए ।
'विश्वास घात'
नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी शर्मा ओलीले संविधान निर्माणताकाको संसद् विघटन गर्न नसकिने प्रावधानको सम्झौता तथा सहमतिमाथि विश्वास घात गरेको बताए ।
जनयुद्धको योगदानको सही मूल्यांकन गर्नुपर्नेमा जोड
नेता डा. भट्टराईले ‘जनयुद्ध’को जगमा आजको परिवर्तन आएकाले जनयुद्धलाई नकार्न नहुने बताए । जनयुद्ध केही पनि थिएन भन्ने इतिहास बनाउन लागिएको भन्दै उनले जनयुद्धको योगदानको सही मूल्यांकन गर्नुपर्नेमा जोड दिए ।
जसपाका नेता अशोक राईले विचार, सिद्धान्त, दर्शन र दृष्टिकोणको हिसाबबाट हेर्दा जनयुद्ध जारी रहेको आफ्नो ठम्याइरहेको बताए । बन्दुक पड्काउनुपर्ने स्थितिलाई शान्ति सम्झौताले पूर्णविराम लगाएको भए पनि वैचारिक, सैद्धान्तिक हिसाबको दुईखालको घर्षण हुनुले जनयुद्ध जारी राख्नुपर्ने आवश्यकता रहेको उनको भनाइ थियो ।