काठमाडौं । कञ्चनपुरकी निर्मला पन्त र बैतडीकी भागरथी भट्टको बलात्कार र हत्यामा संलग्नलाई सार्वजनिक गर्न माग गर्दै शनिबार माइतीघर मण्डलमा प्रदर्शन गरिएको छ ।

बागबजारस्थित पद्मकन्या क्याम्पसबाट विरोध प्रदर्शन सुरु भएको थियो । माइतीघरसम्म युवतीहरूले मार्च पास गर्दै प्रदर्शन गरे ।

प्रदर्शनमा सहभागी युवतीहरूले आँखामा कालोपट्टी बाँधेर विरोध जनाएका थिए । बलात्कारी गरी हत्या गरिएका निर्मला र भागरथीका अपराधीहरुलाई तुरुन्तै सार्वजनिक गर्न र पीडितलाई न्याय दिन उनीहरुले माग गरे ।

सहभागीहरुले ‘बलात्कारी खोइ सरकार ?’, ‘अपराधी खोइ सरकार ?’, ‘हत्यारालाई कारबाही गर’लगायतका नारा लेखिएका पर्चा बोकेका थिए ।