काठमाडौं । बलात्कारीलाई सार्वजनिक गर्न माग गर्दै काठमाडौंको माइतीघर मण्डलमा शनिबार पनि प्रदर्शन गरिएको छ ।
आँखामा कालोपट्टी बाँधेर विरोध प्रदर्शनमा उत्रिएका युवतीहरुले बलात्कारी, हत्याराहरुलाई सार्वजनिक गर्न र पीडितलाई न्याय दिन माग गर्दै नाराबाजी गरे । उनीहरुले केही समय धर्नासमेत दिएका थिए ।
सेतो लुगा लगाएर कपाल फिँजाएर ब्यानरसहित अग्रभागमा तीनजना महिलाले प्रतीकात्मक रूपमा विरोध प्रदर्शन गरेका थिए । उनीहरुको पछाडि मुखमा कालो टेप लगाएका युवतीहरु थिए । सोहीबीचमा आँखामा कालोपट्टी लगाएर युवतीहरुले महिला सुरक्षा, अपराधीलाई कारबाही र पीडितलाई न्याय दिन माग गरिरहेका थिए । उनीहरुले ‘तिम्रा कानुन चाहिँदैन, छोरी मार्न पाइँदैन’, ‘हत्यारालाई सार्वजनिक गर’जस्ता नाराबाजी गरेका थिए ।
मुलुकका विभिन्न स्थानमा बालिका बलात्कार र हत्यामा संलग्नको पहिचान र कारबाही नभएपछि त्यसको विरोधमा दोषीलाई कार्बाही, पीडितलाई न्याय र बालिका तथा महिला सुरक्षाको प्रत्याभूति गर्न माग गदै काठमाडौंमा केही दिनयता प्रदर्शन हुँदै आएको छ ।
तस्बिरः हरिशजंग क्षेत्री/बाह्रखरी ।
