काठमाडौं । कोभिड–१९ विरुद्धको पहिलो चरणको खोप लिने सूचीमा सरकारले सञ्चारकर्मीलाई समेटेसँगै काठमाडौं उपत्यकाका करिब ८० प्रतिशत सञ्चारकर्मीले खोप लगाएका छन् ।
यही माघ १४ गते सुरु भएको कोभिड–१९ विरुद्धको खोप अभियानअन्तर्गत माघ २६ गतेदेखि सञ्चारकर्मी र कूटनीतिक नियोगका कर्मचारीलाई समेत खोप दिन थालिएको थियो । तीन दिनको अवधिमा सञ्चारकर्मी र कूटनीतिक नियोगका कर्मचारी गरी तीन हजार १४३ जनाले खोप लगाएका छन् । यी दुई वर्गका लागि शुक्रबारसम्म काठमाडौं उपत्यकाबाट खोप दिइनेछ ।
सरकारले खोपको पहिलो प्राथमिकतामा स्वास्थ्यकर्मी, सुरक्षाकर्मी, शववहान तथा एम्बुलेन्स चालक, सफाइकर्मी, कैदीबन्दी र वृद्धाश्रमका कर्मचारीलाई राखेको थियो । पहिलो चरणमा चार लाख ३० हजार नागरिकलाई खोप दिने लक्ष्य भए पनि ११ दिनसम्म चलेको पहिलो चरणको लक्षित वर्गमध्ये एक लाख ८४ हजार ८५७ जनाले खोप लगाएका थिए ।
कसरी परे सञ्चारकर्मी प्राथमिकतामा ?
स्वास्थ्य तथा जनसंख्यामन्त्री हृदयेश त्रिपाठीले भारत सरकारले अनुदानमा दिएको १० लाख डोज खोप पाउने वर्ग क्रमैसँग प्राथमिकीकरण गर्दै जाने घोषणा खोप ल्याएकै दिन गरेका थिए । लक्षित वर्गलाई दिएर बाँकी रहेको खोप अग्रपंक्तिमा खटिने पेसाकर्मीलाई दिने क्रममा सञ्चारकर्मी पनि प्राथमिकतामा परेका हुन् । प्रदेशस्तरमा लक्षित वर्गमध्ये अधिकतम ९० प्रतिशतले मात्रै खोप पाएका छन् । सरकारले प्राथमिकतामा राखेका वर्गलाई पूर्ण खोप दुवै डोज दिइसक्दा पनि झन्डै एक लाख ३० हजार डोज खोप बाँकी रहने भएपछि अन्य वर्गलाई दिन थालिएको हो ।
स्वास्थ्य तथा जनसंख्या मन्त्रालयका एक उच्च अधिकारी भन्छन्, ‘‘सरकारको प्राथमिकतामा अब ज्येष्ठ नागरिकलाई राखिएको थियो । तर, खोप लगाएका व्यक्तिहरुमा देखिएको सामान्य साइड इफेक्टले पनि ज्येष्ठ नागरिकलाई धेरै असर गर्ने देखियो । त्यही असरका कारण उनीहरुमा गम्भीर स्वास्थ्य समस्या देखिएमा त्यसको सन्देश नराम्रो जानसक्छ, यसले सरकारलाई पछिसम्मको खोप कार्यक्रममा असर गर्ने देखियो । अर्को कुरा, यो खोप सरकारले अबको दुई हप्ताभित्र सकिसक्नुपर्ने हुन्छ । किनकि, मार्चको पहिलो हप्ता कोभ्याक्सको खोप आइपुग्ने सम्भावना धेरै छ । त्यसमाथि अग्रपंक्तिमा खटिएका हिसाबले पनि सञ्चारकर्मीलाई खोप दिनु सबै हिसाबले उचित ठानेर यो निर्णय गरेका हौँ ।’’
दोस्रो चरणको खोप प्राथमिकतामा को–को ?
सरकारले कोभिड–१९ विरुद्धको दोस्रो चरणको खोप अभियान फागुन २ देखि ८ गतेसम्म सञ्चालन गर्ने भएको छ । दोस्रो चरणको प्राथमिकतामा सबै सरकारी कार्यालय, सार्वजनिक संस्थान तथा बैंकका कर्मचारीहरु, पत्रकारहरु, स्थानीय तहका निर्वाचित जनप्रतिनिधिहरु, सीमा सुरक्षा पोस्टमा खटिएका सुरक्षाकर्मीहरु र पहिलो चरणमा छुटेका स्वास्थ्यकर्मीहरु, स्वास्थ्य स्वयंसेवक, एम्बुलेन्स तथा शववहान चालकहरु, शव व्यवस्थापनमा खटिएका सुरक्षाकर्मीहरुलाई राखिएको छ । दोस्रो चरणको खोप अभियान ७७ वटै जिल्लाबाट सुरु गरिनेछ । सबैले सम्बन्धित संस्थाको परिचयपत्रका आधारमा खोप सेवा लिन सक्ने मन्त्रालयले जनाएको छ ।