काठमाडौं । विभागीय टोली एपीएफले काठमाडौंबाहिरको टोली चन्द्रपुर नगरपालिकालाई हराउँदै राजधानीमा जारी महिला राष्ट्रिय लिगमा अपराजित यात्रालाई बुधबार पनि निरन्तरता दिएको छ ।
ललितपुरस्थित अखिल नेपाल फुटबल संघ (एन्फा) मुख्यालयको मैदानमा सम्पन्न खेलमा एपीएफले अपराजित यात्रालाई निरन्तरता दिएको हो । एपीएफले जित निकाल्दा स्ट्राइकर सावित्रा भण्डारीले ह्याट्रिकसहित ६ गोल गरिन् ।
यस्तै कप्तान अनीता बस्नेतले दुई गोल गरिन् । पहिलो मिनेटमै गोलको खाता खोलेकी अनीताले ५४औं मिनेटमा व्यक्तिगत दोस्रो गोल गर्न सफल भएकी थिइन् ।
ह्याट्रिकसहित ६ गोल गरेकी सावित्राले छैटौं, ३३औं, ४७औं, ६०औं, ६२औं र ७९औं मिनेटमा गोल गरेकी हुन् । यससँगै एपीएफले जारी लिगमा लगातार आठौं जित निकालेको छ । एपीएफले ८ खेलबाट २४ अंक जोडेको छ । जितपछि एपीएफले उपाधि उचाल्ने सम्भावनालाई बलियो बनाएको छ ।
पराजित चन्द्रपुरले ८ खेलमा ६ अंक जोडेको छ । चन्द्रपुर लिगको छैटौं स्थानमा छ । लिगअन्तर्गत बिहीबार दुई खेल हुनेछ । पहिलो खेलमा चौदण्डीगढीले वालिङको सामना गर्नेछ । त्यस्तै दोस्रो खेलमा आर्मीले विराटनगरसँग प्रतिस्पर्धा गर्नेछ ।
