काठमाडौं । पश्चिमी वायुको प्रभावले बदली भएको मौसममा आजदेखि सुधार आउने भएको छ । हाल देशमा पश्चिमी न्यून चापीय प्रणालीको आंशिक प्रभाव रहेको छ ।
आजदेखि मौसम सफा हुने मौसम पूर्वानुमान महाशाखाले जनाएको हो । ‘‘आजदेखि देशैभरको मौसम सफा हुँदै जानेछ,’’ महाशाखाकी मौसमविद् सजिना शाक्यले बाह्रखरीसित टेलिफोनमा भनिन्, ‘‘कतै–कतै मौसम सफा भइसकेको छ ।’’
काठमाडौं उपत्यकाको आज बिहान पौने ६ बजेको न्यूनतम तापक्रम १ डिग्री सेल्सियस रहेको उनले बताइन् । महाशाखाले हरेक दिन बिहान पौने ९ बजे गरिने मापनलाई आधिकारिक मानेर वेबसाइटमा प्रकाशित गर्ने गर्छ ।
पश्चिमी वायुको प्रभावले शनिबार देशैभरको मौसममा बदली भएको थियो । देशका केही स्थानमा हिमपातसमेत भयो । काठमाडौं आसपासका उच्च भेगमा समेत हिमपात भएको थियो ।
फाइल तस्बिर ।