दमौली । नेपाली कांग्रेसका वरिष्ठ नेता रामचन्द्र पौडेलले कांग्रेसलाई भरोसाको केन्द्र बनाउनुपर्नेमा जोड दिएका छन् । झण्डै दुई तिहाइ मत प्राप्त सरकारले जनभावनाअनुसार काम गर्न नसकेका कारण जनताको आकर्षण कांग्रेसमा बढेको पौडेलको भनाइ छ ।
देशलाई अस्थिरतातर्फ लैजान नहुनेमा उनले जोड दिएका छन् । दमौलीमा शनिबार आयोजित कार्यक्रममा नेता पौडेलले देशमा स्थायित्व र समृद्धि आवश्यक रहेको बताए ।
नेपाली कांग्रेसले मात्रै देश विकास गर्नसक्ने दाबी गर्दै नेता पौडेलले नयाँ राजनीतिक ध्रुवीकरणले कांग्रेसलाई अवसर प्राप्त भएको चर्चा गरे ।
वरिष्ठ नेता पौडेलले पार्टीको विधान बचाएर कांग्रेसलाई पनि बचाउनुपर्ने बेला आएको बताए । पार्टीभित्र भएका विधानविपरीतका काम सच्याएर अगाडि बढ्नुपर्ने उनले बताए । रासस