काठमाडौं । नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले आमहड्तालको निरीक्षणमा गाडी चढेर गएको विषयप्रति प्रस्टीकरण दिएका छन् ।
शुक्रबार बिहान ललितपुरस्थित होटेल हेरिटेजमा आयोजित पत्रकार सम्मेलनमा आफूले हिँड्न खोजेको भए पनि सुरक्षाकर्मीले खुला रूरुपमा छोड्न सक्दैनौँ भनेपछि गाडी चढेको सुनाए ।
“घरैबाट हिँडेर जाने सोचेको थिएँ । हामीले त छोड्न सक्दैनौँ भन्नुभो, सेक्युरिटीले । अरु साथीहरुले पनि । परसम्म गाडीमा जाऔँ अनि हिँडेर भनेर आइयो । सातदोबाटोको कार्यक्रममा त हिँडेरै गएँ । तीन–चारवटा कार्यक्रम हेरौँ भन्ने भयो,’’ प्रचण्डले भने ।
निरीक्षण क्रममा पुल्चोक जाँदा घण्टौँ लाग्ने भएपछि आफूले गाडी चढेको उनले बताए । बिहीबार प्रचण्ड–नेपाल समूहको आमहड्तालमा प्रचण्डले गाडी चढेर गएको विषयप्रति सामाजिक सञ्जालमा आलोचना भएको थियो ।
प्रधानमन्त्री केपी शर्मा ओलीले पनि किसान महासंघको कार्यक्रममा बोल्दै ‘जनताको दुःख हेर्न गाडीमा सयर’ भन्दै व्यंग्य गरेका थिए ।
फाइल तस्बिर ।